Breudwd Rhyddiaith Gymraeg 1300-1425
English

LlGC Llsgr. Peniarth 18 – tudalen 54r

Brut y Tywysogion

54r

oed y cantref hỽnnỽ idaỽ ac o|e ỽyr. A|llidyaỽc uu
lyỽelyn am hynny. A chynullaỽ llu a|chyrchu lle
yd oed ruffud drỽy vygythyaỽ dial yr hynt hon+
no arnaỽ ac ar y|ỽyr. Ac aros a|ỽnaeth yn ehof+
yn dyuodyat y|tat ỽedy kyỽeiraỽ y vydinoed a|e
lu. Ac yna yd edrychaỽd doethon o|boptu meint
y|perigyl a|oed yn dyuot. Ac annoc a|ỽnaethant
y ruffud ym·rodi ef ar eidaỽ ynn eỽyllys y|tat.
Annoc heuyt a|ỽnaethant y|lyỽelyn kymryt y
vap yn hedỽch yn drugaraỽc. A madeu idaỽ gỽ+
byl o|e lit o|eỽyllys y callon. Ac velly y|gỽnaeth+
pỽyt. Ac yna y|duc llywelyn y|ar ruffud cantref mei+
ronnyd. A chymỽt ar·dudỽy. A derchreu* adeilat
castell yno a|ỽnaeth idaỽ e|hun. Yg|kyfrỽg hynny
y|llidyaỽd rys Jeuanc ỽrth yr arglỽyd lyỽelin
Ac yd ymedeỽis ac ef. Ac yd aeth at ỽilym mar+
scal iarll pennuro o achos rodi o lyỽelyn caer vyr+
din y|vaelgỽn ap rys. Ac na rodei idaỽ yntev a+
berteiui a|oed yn|y rann pann rannỽyt deheubarth.
Ac yna y|deuth llywelyn a|e lu hyt yn aberestỽyth. Ac
y|goresgynnaỽd y|castell ar|kyuoeth a|oed ỽrthaỽ
ac y|dodes dan y|arglỽydiaeth e|hun. Ac yna y|kyr+
chaỽd rys Jeuanc lys y|brenhin. A chỽynaỽ a|or+
uc ỽrth y|brenhin am|y|sarhaet a|ỽnathoed lyỽ+
elyn idaỽ. A|dyuynnv a|ỽnaeth y|brenhin ataỽ
lyỽelyn. A ieirll. a|barỽneit y|mars hyt yn amỽy+