LlGC Llsgr. Peniarth 18 – tudalen 51r
Brut y Tywysogion
51r
gỽedy ymlad yn|hir o·honunt o|bop tu. ef a|diade+
llaỽd bydin y|ỽrth y|llu yr honn yd oed iarll caer
lleon. A ffaỽckun breỽys yn|y harỽein. A|thrỽy drỽs
dieithyr ar|y castell y|deuthant y|myỽn. A chyrchu
y|dinas a|ỽnaethant. A gỽneuthur diruaỽr aer+
ua ar|y ffreinc ar gogleddỽyr. Ac ỽynteỽ ỽedy y
haruthraỽ a|gymerassant eu ffo. A megys ynvy+
dyon pob vn onadunt yr ymgudyei yn|y lle kyn+
taf y caffei. Ac yna y kyrchaỽd gỽyr henri vren+
hin y|pyrth ac y|torrassant ac y|doethant y|my+
ỽn ac ymlit y|ffoodron a|e llad a|e dala a|e carcha+
ru. Ac yn|y vrỽydyr honno y delit iarll caerỽynt
a iarll henfford. a robert ap gỽallter. Ac y llas ia*+
arll perssi y bonhediccaf hayach o|r ffreinc. a si+
mỽnt depessi. a hu dy roc. a gylbert iarll clar. a|ro+
pert derupel. a|reinalt dy cressi cỽnstabyl caerlle+
on. A gerald defỽrneuaỽs. A llaỽer o|rei ereill pennaf.
Ac anneiryf onadunt a|vodes yn|yr auon. Ac velly
yd ymhoelaỽd gỽyr y|brenhin yn llaỽen dracheuen.
drỽy voli duỽ y|gỽr a|ỽnaethoed rydit yr bopyl.
Ac yna yn ofynaỽc y peidaỽd leỽys ac ymlad ar
castell ac y|bryssyaỽd y|lundein. Ac anuon kena+
deu a|ỽnaeth y|ffreinc yn ol nerth. Ac yna y ket+
ỽis gỽyr y|brenhin y|porthueyd a|llu gantunt
Ac yna y deuth y|ffreinc y|hỽylaỽ y|moreoed* a diues+
sur o lyges gantunt. a|cher bronn aber auon te+
| « p 50v | p 51v » |