LlGC Llsgr. Peniarth 18 – tudalen 43v
Brut y Tywysogion
43v
diffeithaỽd ac y|llosges maelgỽn ap rys dinbych
y|gỽr a|oed trayan taryan* a|chedernnyt yr deheu
oll. kanys egluraf oed y clot. A thec a|charedic
oed gann baỽp. kyt kymhedraỽl y|veint. garỽ
ỽrth y elynyon. hegar ỽrth y|getymeithon. para+
ỽt y|rodyon. budygaỽl ynn ryuel. Ar holl tyỽ+
yssygyonn kyt amhinogyon ac ef. a|e hergry+
nynt. kyffelyb y|leỽ yn|y ỽeithredoed. ac megys
keneu lleỽ aruthur yn|y helua. y gỽr a|ladaỽd lla+
ỽer o|r fflandrasỽyr. Ac a|e gyrraỽd ar ffo. Y|ulỽy+
dyn racỽyneb y|deuth y|sarascinyeit ar iỽdeỽon*
y|gaerussalem gann duyn y groc gantunt dyỽ
merchyr y lludu. a goresgyn carussalem. a|chyme+
int a|gagaỽssant* o gristonogyon yndi llad rei
a|ỽnaethant. a|dỽyn ereill y|geithiỽet. Ac o achos
hynny y|kymerth phylib urenhin ffreinc. a|hen+
ri urenhin lloegyr a|baltỽin archescob keint.
Ac anneiryf o|luosogrỽyd cristonogyon arỽyd+
don croes crist. arnunt. Y ulỽydyn racỽyneb y|bu
uarỽ henri. Ac yn|y ol ynteu y|coronet rickert
y|vap yn|urenhin y|marchaỽc goreu a gleỽhaf.
Yn|y ulỽydyn honno y|goresgynnaỽd yr arglỽyd
rys castell seint cler. ac aber corran. a|llann yys+
typhan. Yn|y ulỽydyn honno y delit maelgỽyn
ap rys. y gann y|tat. trỽy gyghor rys y vraỽt.
Ac y|carcharỽyt.
| « p 43r | p 44r » |