Breudwd Rhyddiaith Gymraeg 1300-1425
English

LlGC Llsgr. Peniarth 18 – tudalen 41r

Brut y Tywysogion

41r

y|goresgynnaỽd dauid ap yỽein holl ỽyned ỽedy
gỽrthlad ohonaỽ y|holl urodyr. a|e holl eỽythdred.
Y ulỽydynn honno y|delis dauid ap yỽein vaelgỽyn
y vraỽt. Ac y carcharaỽd. Yn|y ulỽydyn honno y|bu
uarỽ kynan|ap yỽein gỽyned. Yn|y ulỽydyn ỽedy y
hynny y|delis hoỽel ap ioruerth o gaer llion hep
ỽybot ỽy tat yỽein penn carnn y|eỽythyr. A gỽedy
tynnv y lygeit o|e penn y|peris y yspadu rac mei+
thrin etiued ohonaỽ a|ỽledychei caer llion ỽedy hyn+
ny. Ac yna o deissyuyt gyrch y|goresgynnaỽd y|ffre+
inc gaer llion. Ac y|gyrrassant ymeith odyno ior+
uerth. a hyỽel y|vap. Yn|y ulỽydyn honno yd hed+
dychaỽd henri urenhin hynaf. A henri ieuaf gỽe+
dy diruaỽr distryỽedigaeth normandi. a|e chynes+
safyeit ỽledyd. Ac yna y delis dauid ap yỽein drỽy
dỽyll rodri ap yỽein y|vraỽt vn vam vn tat ac
ef. Ac y karcharaỽd myỽn geuyneu kyuyg am
geissaỽ kyurann o|tref y|tat gantaỽ. Ac yna y|pri+
odes y|dauid hỽnnỽ dam em hỽaer y brenhin lloe+
gyr drỽy tebygu gallel ohonaỽ cael y|gyuoeth
yn llonyd hedychaỽl o|r achos hỽnnỽ. Ac yna y|di+
eghis rodri o|garchar dauid y vraỽt. A chynn di+
ỽed y|ulỽydyn y|gỽrthladaỽd ef dauid o von. Ac
o ỽyned yny doeth drỽy auon gonỽy. Ac yna yd
ymbaratoes yr arglỽys* rys ap grufud ỽrth vynet
y|lys y|brenhin hyt yg|kaer loyỽ. Ac y|duc ygyt