Breudwd Rhyddiaith Gymraeg 1300-1425
English

LlGC Llsgr. Peniarth 18 – tudalen 3v

Brut y Tywysogion

3v

mryt agarỽ benyt ar eu kyrff. kanny lyuassei y|fre+
inc kyrchu y creigeu ar coedyd namyn gỽibyaỽ. a|ch
ylchynu y|gỽastadyon ueissyd. yn|y diỽed ynn orỽac
yd ymhoelassant adref. hep ennill dim. ar|bryttan+
nyeit ynn hyuryt diergrynedic a amdiffynnassant
eu gỽlat. Y ulỽydyn racỽynep y kyffroes y|ffreinc lu+
oed y|trydedỽeith ynn erbyn gỽyned. a|deu tyỽyssa+
ỽc yn|y blaen. a|hu iarll amỽythic ynn  .
bennaf arnunt. a|phebyllaỽ a|orugant yn erbynn
ynys von. A|r brytannyeit ỽedy yr gilyaỽ y|r lleoed
kadarnnaf vdunt o|e gnotaedic deuaỽt. ac a|gaỽssant
yn|y kyghor achubeit mon. a|gỽahaỽd attunt ỽrth
amdiffynn vdunt llyges ar uor o|e Jỽerdon. ar gỽa+
hodedigyon trỽy gymryt y|rodyon ar gobreu y|gann
y|ffreinc. a dugant y freinc y von. Ac yna yd edeỽis
cadỽgaỽ ab pledyn. a grufud ap kynan ynys von. ac y
kilyassant y iỽerdon rac ouyn tỽyll y|gỽyr e|hun.
Ac yna y deuth y|freinc y|r ynys y|myỽn. ac y|lladas+
sant rei o|ỽyr yr ynys. ac val yd|oedynt ynn trigyaỽ
yno y deuth magnus brenhin germania a rei o|logeu
gantaỽ hyt ymon. trỽy obeithaỽ cael gorescyn ar
holl ỽladoed y|bryttannyeit. a gỽedy clybot o magnus
urenhin y|freinc yn mynych vedylyaỽ. diffeithaỽ yr
holl ỽlat a|e dỽyn hyt ardim. dyuryssaỽ a|oruc eu kyr+
chu. Ac ual yd oedynt ynn ymsaethu y|neill rei o|r
mor. a|rei ereill o|r tir. y|brathỽyt hu Jarll yn|y ỽyneb