Breudwd Rhyddiaith Gymraeg 1300-1425
English

LlGC Llsgr. Peniarth 18 – tudalen 32r

Brut y Tywysogion

32r

maredud a chastell ial. ac y|llosges. Y ulỽydyn
rac ỽynep y|llas morgan ap oỽein ỽann trỽy
dỽyll y|gann ỽyr ioruerth ap meuryc. a chyt ac
ef y|llas y|prydyd goreu a hỽnnỽ a|elỽit gỽrgant
ap rys. Ac yna y|gỽledychaỽd ioruerth ap oỽein
uraỽt morgant dir caer llion. A holl gyuoeth
yỽein. A gỽedy gỽneuthur o|holl tyỽyssogyonn
kymry hedỽch ar|brenhin. rys ap grufud e|hunan
a|darparaỽd ỽneuthur ryuel ac ef. a|mudaỽ a|oruc
holl deheubarth a|e holl aniueileit. A|e holl da gan+
tunt hyt yg|koedir ystrat tyỽi. A|phann gigleu
y|brenhin hynny. anuon kennadeu a|oruc at
rys y venegi idaỽ bot yn gryno idaỽ vynet y|lys
y|brenhin. yn gynt noc y|dyckei loegyr a chymry
a phreinc am|y|benn. ac nat oed neb eithyr ef
e|hun yn ym·erbyn ar brenhin. A gỽedy mynet
yg|kygor ef a|e ỽyrda. ef aeth y|lys y|brenhin. Ac
yno y|goruu arnaỽ o|e anuod hedychu ar|brenhin.
gann amot idaỽ caffel y cantref maỽr. A|chantref
arall o|r a vynnei y|brenhin y|rodi idaỽ yn gyfan
hep y|wasgaru. Ac ny chynnhelis y|brenhin ac
ef hynny. namyn rodi dryll o|tir idaỽ yg|kyfo+
eth pob barỽn o amryuaelon varỽneit. A|chyt
dyallei rys y|tỽyll hỽnnỽ. kymryt a|oruc y|ran+
nev hynny a|e kynnal yn hedychaỽl. Ac yg|kyf+
rỽg hynny kyt dyuryssyei rosser Jarll clar