LlGC Llsgr. Peniarth 18 – tudalen 29r
Brut y Tywysogion
29r
geralt archdiagon keredigyaỽn. yn|y ulỽydyn hon+
no y bu varỽ robert escob henfford. gwr o|oed her+
wyd yn barnỽraeth ni grefydus a|chyflaỽn o|weith+
redoed cardodeu. a|hegar borthỽr y tlodyon. ac arben+
nic degỽch yr eglỽys yn gyflaỽn o dydyeu da hyt
na lygrit cadeir y veint prelat hỽnnỽ o anheilỽg
erlynaỽdyr. yna yd ỽrdỽyt gilbert abbat caer
loyỽ yn escob yn henfford. y ulỽydyn honno y|bu
diruaỽr uarỽolaeth yn ynys prydein. Y vlỽydyn
racwyneb yd adeilaỽd ywein ap Gruffud ap kynan
castell yn ial. Yn|y ulỽydyn honno yd adeilaỽd cat+
waladyr ap Gruffud gastell yn llan rystut o gỽbyl.
ac y rodes y ran ef o|geredigyaỽn y gadỽgaỽn y vab.
y|ghylch diỽed y ulỽydyn honno yd adeilaỽd Mada+
ỽc ap Meredud castell croes oswalt ac y rodes gyuei+
laỽc y owein a Meuruc Meibon Gruffud ap Mere+
dud y|nyeint. Y vlỽydyn racwyneb yd atgyweir+
aỽd cadell ap Gruffud castell caer vyrdin yr tegỽch
a|chydernit yr deyrnas. ac y diffeithaỽd getweli y+
n|y ulỽydyn honno y carcharỽyt ywein vrenh+
in gỽynned a|chynan y vab. yn|y ulỽydyn honno
y|delis howel ap ywein. catuan vab catwaladyr y
gefynderỽ. ac yd achubaỽd y|tir a|e gastell. ny bu
bell wedy hynny yny doeth Meibon Gruffud ap
rys nyt amgen cadell. a|Meredud. a Rys a|llu gan+
tunt y geredigyaỽn a|e gỽerescyn hyt yn aeron.
| « p 28v | p 29v » |