Breudwd Rhyddiaith Gymraeg 1300-1425
English

LlGC Llsgr. Peniarth 18 – tudalen 20r

Brut y Tywysogion

20r

verch dyfynỽal. ar trydyd oed vorgant ap Cadỽ+
gaỽn o ellylỽ verch kediuor ap gollỽyn. y|gỽr a
uu penhaf arglỽyd ar wlat dyfet. Petỽyryd vu
henri vab cadỽgaỽn o|r ffranges y|ỽreic Merch
pictot teỽyssaỽc o|r ffreinc. Ac o|honno y|bu vab a+
rall idaỽ a elỽit Gruffud. y whechet vu varedud.
o euron verch hoedlyỽ ap cadỽgaỽn ap elstan. a
gỽedy hynny yd|ymaruolles Einaỽn ap cadỽgaỽn
ap bledyn. a|gruffud maredud. ap bledyn. ygyt y|dỽyn kyr+
ch am benn castell vchdryt vab etỽin a|oed gefyn+
derỽ y vledyn vrenhin. kanys Jỽeryd mam yỽein
ab vchdryt veibon etỽin. a bledyn vab kynnuyn
oedynt braỽt a whaer vn|dat ac nyt vn vam. ka+
nys agharat verch varedud ap yỽein oed vam
bledyn. a|chynuyn ap gỽerstan oed eu tat yll
deu. ar castell ry|dyỽedassam ni a|oed yn|y lle a elỽir
kymher ymeiryonnyd. kanys Cadỽgaỽn vab ble+
dyn a rodassei Merionnyd a|chyfeilaỽc y vchdryt
vab etỽin dan amot y vot yn gyỽir idaỽ ac a|e vei+
bon ac yn kymhorthỽr yn erbyn y|holl elynnyon.
ac ynteu oed vrthnebỽr ac ymladgar yn erbyn
cadỽgaỽn a|e veibon. a gỽedy colli yỽein heb ty+
byeit gallu dim o ueibon cadỽgaỽn. y gỽnaeth
ef y dyỽededic castell. ac ỽyntỽy a|dyỽessam* ni
vry drỽy sorr a|gyrchassant y|gastell ac a|losgassa+
nt gỽedy ffo rei o|r gỽercheitỽeit a dyuot ereill.