Breudwd Rhyddiaith Gymraeg 1300-1425
English

LlGC Llsgr. Peniarth 18 – tudalen 12v

Brut y Tywysogion

12v

a|thrayan deudỽr. Ac aberriỽ. Y|ulỽydynn racỽyneb
y|kyffroes henri urenhin luyd ynn erbyn gỽyned Ac
ynn bennaf ym poỽys. A gỽedy barnu ar yỽein gỽneu+
thur agkyureitheu y|guhudaỽ a|oruc gilbert uap ri+
kert ỽrth y brenhin. A dyỽedut bot gỽyr yỽein ynn
gỽneuthur lledradeu. ar|y|ỽyr a|e tir. Ar petheu a|ỽn+
nelei ereill. a|dyỽedit ar|y|ỽyr ef. A chredu a|oruc y|bren+
hin vot pob peth o|r a dyỽat y cuhudỽr ynn|ỽir. Yg|kyf+
rỽg hynny cuhudaỽ a|oruc map hu iarll caerllion. grufud
ap kynan. A goronỽ ap oỽein. Ac aruaethu a|ỽnaeth+
ant o|gytundep mynnv dileu yr holl bryttannyeit o
gỽbyl hyt na choffeit brytannyaỽl enỽ ynn tragyỽy+
daỽl. Ac ỽrth hynny y|kynnullaỽd henri urenhin lu
o|r holl ynys. o|bennryn penn gỽaed ynn Jỽerddon hyt
ym pennryn balathaỽon yn|y gogled ynn erbyn gỽy+
ned a|phovys. A|phann gigleu meredud ap bledynn
hynny. mynet a|ỽnaeth y geissaỽ kyfueillach y|gann
y|brenhin. A gỽedy adnabot hynny o yỽein kynnullaỽ
y|holl|ỽyr a oruc. A|e holl da. A|mudaỽ hyt ymyneded ery+
ri. kannys cadarnnhaf lle. a|diogelaf y|gael amdiff+
ynn yndaỽ rac y|llu oed hỽnnỽ. Yg|kyfurỽg hynny yr
ansodes y|brenhin tri llu. un gyt a gilbert tyỽyssaỽc o
gernyỽ. A|bryttannyeit y|deheu. a|ffreinc. a saesson.
o|dyuet. Ar deheu oll. A llu arall o|r gogled. ar alban.
gyt a deu tyỽyssaỽc. nyt amgen. noc alexander uab
moelcỽlỽm. A mab hu iarll caerllion. Ar trydyd y+