LlGC Llsgr. Peniarth 15 – tudalen 72

gorvot ar|gẏthrevl herwyd y vot y|dvw Ac agori pyrth nef ẏ|r etholẏdigẏon

A|e gwnnevthvr ẏn gyffelyp y|r egẏlẏon ar* o|annyan dẏn godef anghev yn

annyledvs yr hẏn oed voy no|r bẏt Ac yd oed dẏlẏet ar dẏn e|hvn y|wnnev+

thvr. Discipulus Paham yntev y|mynnawd dvw ẏ|eni o|r wẏrẏ. Magister. O petvar mod

y|mynnawd dvw wnnevthvr dẏnẏon vn yw heb dat a|hep vam megẏs a+

daf o|r|dayar Yr eil yw o|dat hep vam megys eva o adaf Y|trẏddẏd* ẏw o.

vam a|that megys pob dẏn ohonam ni yr awr·honn Y petweryd o vam

e|hvn megẏs y|doeth anghev y|r byt. drwẏ eva yn vorvẏnn vellẏ y|doeth

Jechẏt y|r bẏt drwy yr wẏry veir Discipulus Paham o|veir mwy noc o|vor+

wẏn arall. Magister. am rodi ohonei govvnet yn gẏntaf eiroet y|dvw kynnal

gwerynndawt ẏn|ẏ byt hwn. Discipulus. Paham na doeth ef yg|knawt kẏn diliw

ẏn|ẏ lle pei doethoed kẏnn diliw Ef a|dẏwedei y|mae y|gan y|rye·ni a|oed

newẏd dyvot o|baradwẏs y|dẏsgessynt y|da Nev pei doethoed ef yn|ẏ lle

wedẏ diliw wynt a|dẏwedẏnt y mae wrth noe ac effream ẏ|dẏwedassei

dvw pob peth o|r a|dẏwedessẏnt Discipulus Paham na doeth yntev yn amser

ẏ|defyd* pei doethoed yna Ef a|dẏwedei yr Jdeon y|mae y|dedyf a|e dysgassei

wẏnt yn dogẏn A|r|sarastineit* a|dywedẏnt y|mae y|doethov* a|e dysgassei

wyntev. Discipulus. Paham nat amodes yntev dyvot hẏt yn diwed yr oes

.Magister. Ry|vychan yna y|disgẏblẏnt wrthaw ac ny|chẏfvlenwẏt rif yr etho+

ledigyonn Ac wrth hẏnnẏ y|bv reit idaw dyvot yg|kfvlawnder* yr am+

ser Discipulus. Pa amser vv hwnnw. Magister. Ym|perfed y|bẏt Discipulus Pa|ffvryf y|ga+

net ef o|r wẏrẏ. Magister. hep uvdred a|hep dolvr.. Discipulus. Paham y|bv ef naw|mis

ym|brv yr wẏrẏ. Magister. Yr dangos y|degei ef bawp o|r a|ẏttoẏdẏnt yg|gwarchar*+

chaev trveni ẏ|bẏt hwn yg|ketymeithas naw rad er egylyon Discipulus. Pa awr

y|ganet ef. Magister. megẏs ẏ|dẏweit y|proffwyt hanner nos y|doeth ef o|e eistedv+

aev brenhinawl Discipulus Paham y nos. Magister. Y|dwẏn y|rei a|oedẏnt yn tywyllwch

kefeilorn y|olevni gwironed Discipulus A oed synnwẏr gann grist Ac ef yn uy  ̷+

chan. Magister. Ef a|wydat pob peth megẏs dvw ẏn|ẏr hwn yd oeddẏnt holl

dryzor gwybot a|doethineb kvẏdẏedic Discipulus. Allei ef dywedvt pann anet na

cherdet. Magister. Gallei pei sy* |mẏnhei nys mẏnnawd ef hagen sẏmvdaw dynnawl

annyan Discipulus A|damweinawd nep ryw anrẏvedawt pann anet krist. Magister.

 damweinawd Seith gwahanredawl Discipulus Pa|rei vv y|rei hẏnnẏ. Magister.

Y kyntaf seren dirvawr y golevni a|ẏmdangosses. Yr eil kylch ev·reit a|ym+

dywynnygawd ygylch yr hevl Y|trydẏd ffẏnnawn o olew a|dardawd o|r

dayar Y petwerẏd tagneved a|vv yna yn|yr holl vyt Y pẏmet ysgri+

vennv a|wnnaethpwẏt y|r holl vẏt y|dalv swllt y|rvfein Chwechet

deg|mil ar|hvgein o|r rei a|ymwrthodes a dvw a|las yn|yr vn dyd Seith+

vet yr annyveil mvt a|dywat Discipulus. Mi a|vynnwn wybot ẏstẏr y|rei hẏnnẏ