Breudwd Rhyddiaith Gymraeg 1300-1425
English

LlGC Llsgr. Peniarth 12 rhan ii – tudalen 58v

Ystoria Lucidar

58v

y gỽr a vu vyỽ vil o vlỽynyded. discipulus Owi o|r maỽredigrỽyd. Ef
a|welit ymi pei rodit dewis y dyn ar hynny oỻ. ef a|dewissei
bop vn o·honunt ymblaen brenhinyaeth. Pỽy bynnac ha+
gen a vei arnaỽ hynny oỻ o gampeu dewissach oed no|r hoỻ
vyt. Magister Reit yỽ ytti dewi etto tra vych yn gỽarandaỽ peth+
eu a vo gỽeỻ. a|pha beth ygyt ac a|ennwit uchot. pei
bydut kyn doethet a selyf. y gỽr oed amlỽc idaỽ bop peth
kudyedic. discipulus Owi duỽ o hynny. Magister Beth y·gyt a|hynny
oỻ pei|bydei bop ryỽ dyn kyn gedymdeithasset ytt. ac y
bu dauyd a Jonathas. yr hỽnn a|garaỽd yn gymeint
a|e eneit. discipulus Owi duỽ o|r gỽynvytedigrỽyd. Magister Beth y·gyt
a hynny pei bydei baỽp mor du·un a|thi. ac y bu lesius
a|sipio. y gỽyr ny mynnei yr vn onyt a vynnei y ỻaỻ. discipulus
Owi o|r duundeb. Magister Beth y·gyt a hynny pei bydut kyn
gyvoethocket ac y bu alexander maỽr y gỽr a|oresgyn+
naỽd yr asia a|r affrica ac europpa. discipulus Owi o|r goruchelder.
Magister Beth ygyt a hynny oỻ pei kymeint dy enryded di y gan
baỽp. ac y bu iosep y gan wyr yr|eifft. y gỽr a|adolassant ỽy
megys pei duỽ vei. discipulus Owi o|r parch. Magister Beth y·gyt a|hynny
oỻ pei bydut mor dioual ac eli ac enoc y gỽyr yssyd yn eu
heneidyeu a|e kyrff ym paradwys. discipulus Owi duỽ o|r maỽredigrỽ+
yd hỽnnỽ. Magister Beth y·gyt a hynny pei bydei ytt gedymde+
ith a garut yn gymeint a|thy hun ac ynteu y|th garu di+
theu ueỻy. ac yn|gyuoethaỽc o|bop parth pony bydei deu+
dyblic y karyat hỽnnỽ discipulus Owi o|r diruaỽr lewenyd.
Magister Beth bettei ytt lawer o gedymdeithyon. yn vn ffunyt ac
y dywetpwyt uchot. pony bydei ytti y geniuer ỻewenyd.
Owi