Breudwd Rhyddiaith Gymraeg 1300-1425
English

LlGC Llsgr. Peniarth 12 rhan ii – tudalen 48r

Ystoria Lucidar

48r

a|dywedir eu bot yn amperffeith. a|phaỽb ohonunt eissyoes a
gaffant duỽ megys dynyon priaỽt. ỽynt a|gaffant gỽedy
bont veirỽ herwyd ual y gobrỽyont y ỻeoed teckaf. a|ỻawer
ohonunt kynn dyd·braỽt drỽy wedieu seint. ac alussenneu
y rei byỽ a gymerir y ogonyant a|vo mỽy. paỽp hagen gỽ+
edy dyd·braỽt a gedymdeithockeir a|r engylyon. ac y|mae rei
o|r etholedigyon heb perffeithyaỽ ỻawer ar·nunt. a|r rei hynny
a|oedassant am benydyaỽ eu pechodeu. ac megys y rodir mab
afreolus att y gỽas o|e vaedu. ueỻy y kanhatta engylyon da y
gythreulyeit eu purhau ỽynteu. ac ny allant ỽy argywedu
udunt mỽy noc a|haedassant neu a|ganattao y|seint udunt.
discipulus Beth a|dichaỽn eu rydhau ỽy o|r purdan. Magister Offerenneu ac
alussenneu. a gỽedieu. a gỽeithretoed ereiỻ gỽar. ac yn bennaf
y grymhaa udunt o|r gỽassanaethassant ỽynte ac ỽynt yn vyỽ
gynt ereiỻ. a|r rei onadunt a|rydheir yn|y seithuet dyd. ereiỻ
yn|y decuet ar|hugeint. ereiỻ ym·penn y vlỽydyn. ereiỻ ym|penn
ỻawer o amser. paỽb hagen dyd·braỽt a|vyd kyffelyb y|r engyly+
on. discipulus Paham y gỽneir ỽynt yn ryd yn|y dydyeu hynny mỽy
noc yn ereiỻ. Magister Tri a|phedwar a|vyd seith. drwy y tri y dyeỻir
ffyd y drindaỽt. a|thrỽy y pedwar y dyeỻir dyn. a|gyfansodir o|r
pedwar defnyd. a|r eneit o|r teir|nerth nyt amgen. dosparth a
ỻit a chwant. a|r hoỻ amseroed a|dreiglir o|r seith niwarnaỽt.
ac ỽrth hynny y gỽneir seith nieu y purdan. ual y galler
beth bynnac a bechaỽd yr eneit o|r teir|nerth drỽy bedwar def+
nyd dyn yn erbyn seith rinwed yr yspryt glan y|dileu. Yn|dec
ar|hugeint heuyt y gỽneir. a ỻyna yr achaỽs. drỽy dri dec y
kyvyt dec ar|hugeint. drỽy dri y|dyeỻir newyd dedyf o|achaỽs