LlGC Llsgr. Peniarth 12 rhan ii – tudalen 46r
Ystoria Lucidar
46r
segru o oleỽ kyssegredic a chrisma. megys y|dywedir. Temyl
duỽ glan yỽ yr|honn yỽch chỽi. ỽrth hynny ef a|vyd yn ky+
uanhedu y demyl honn yn wastat. ae yspryt glan. ae vn af+
lan. discipulus Beth a|rymhaa oleỽ y dynyon gỽeinyon. Magister Peth ma+
ỽr. pechodeu a gyffesser ac ny wneler yr|eilweith. neu y|rei
penytyaỽl a uadeuir trỽy yr ireit hỽnnỽ. megys y|dywedir.
Ot ydiỽ ym|pechodeu ac yn ediuar ganthaỽ ỽynt a uadeuir
idaỽ. o·nyt ediuar ny rydhaa dim idaỽ nac y neb. discipulus A rym+
haa ediuarỽch yn|y diwed glỽm. Magister Pỽy|bynnac a|anotto kym+
ryt ediuarỽch am y bechodeu. nyt ỽyntỽy yssyd yn ymadaỽ
a|r pechodeu. namyn y pechodeu ac ỽyntỽy. kanny mynnant
ỽynt yn weisson udunt hỽy no hynny. pỽy bynnac ynteu
a|vo ediuar ganthaỽ o wir gaỻon yn aỽr angeu. ef a|geiff
trugared heuyt yna. megys y kafas y ỻeidyr yn|y groc. ac am
hynny y dywedir. Pa aỽr bynnac y dotto pechadur ucheneit
ef a|vyd iach. discipulus Y gan pa|beth y dywedir angeu. Magister Y gan chỽ+
erwed neu y gan dammeit yr aual gỽahardedic o|r ỻe y doeth
angeu. a|thri ryỽ angeu yssyd an·amseraỽl. megys angeu y rei
bychein. ac angeu chwerỽ. megys un y dynyon ieueingk. ac
angeu annyanaỽl megys un yr hen dynyon. discipulus O|r madeuir
pechodeu yn|y bedyd. ac angeu yn|boen am bechaỽt. paham
y daỽ angeu y|r etholedigyon gỽedy y kaffont vedyd. Magister
Val y|bo mỽy eu gobrỽy o odef angeu yr duỽ. peth arall he+
vyt yỽ. o·ny|delei angeu y bop dyn o|r a vedydyit. paỽb a vrys+
syei y gymryt bedyd o|r|achaỽs hỽnnỽ ac nyt yr|duỽ. ac nyt
ymchoelei neb ueỻy y|r deyrnas. a|duỽ a uadeuaỽd y pechot+
eu yn|y bedyd. ac ny madeuaỽd ef boeneu pechaỽt. megys
| « p 45v | p 46v » |