Breudwd Rhyddiaith Gymraeg 1300-1425
English

LlGC Llsgr. Peniarth 12 rhan ii – tudalen 43r

Ystoria Lucidar

43r

Y pymhet mod drỽy alussen. Megys y dywedir. val y|diffyd y dỽ+
fyr y tan. ueỻy y|diffyd yr alussen y pechaỽt. Chwechet drỽy
uadeu o·honam ni y|r neb a|wnaeth cam ynn. megys y|dywedir.
O|r madeuỽch chỽi y|r dynyon eu kameu. aỽch tat a|e madeu y
chwitheu. Seithuet yỽ drỽy weithretoed caryat. megys y|dyw+
edir. karyat a gud ỻuossogrỽyd pechodeu. discipulus Beth a|dal kyffes.
Magister Kymeint ac a|dal bedyd. kanys megys y madeuir y pechodeu
dechreuaỽl yn|y bedyd. ueỻy y madeuir y pechodeu gỽeithret+
aỽl drỽy gyffes. discipulus A oes varn. Magister Dỽy varn yssyd y duỽ. vn
yma drỽy gyffes. a|r ỻaỻ y|dyd diwethaf drỽy vraỽdỽr. a|r diaỽl
yn guhudỽr. a|r dyn yn gam·gylus. Yna ynteu y byd yr offeiry+
at vickar crist yn vraỽdỽr. a|r dyn yn guhudỽr. a|e gytwybot
yn|y vrathu. a|phỽy|bynnac a|varner yma. ny chuhudir yno
megys y dywedir. Ny barn duỽ arglỽyd dỽyweith yr un peth.
ac yn ỻe araỻ y dyweit. O barnỽn ni arnam. ny bernir yr eil+
weith arnam. discipulus A rymhaa penyt neu alussen onyt edewir y
pechaỽt. Magister Megys na rymhaa neb·ryỽ vedeginyaeth y iach+
au y weli a|e haearn y myỽn. yny tynner yr haearn aỻan.
veỻy ny rymhaa yr hoỻ weithretoed da onyt ymedewir a|r
pechaỽt. kanys pỽy|bynnac a|wnel pechaỽt y mae yn gaeth
y bechaỽt. ac ny dichaỽn neb kaeth rydhau kaeth araỻ. discipulus
a|dal dim y|r rei drỽc wneuthur da. Magister Ef a|geiff pob dyn
dal am bop peth da o|r a|wnel ae yma ae yn|ỻe araỻ. Wynt
a|e kaffant yn|y byt hỽnn. megys y dywedir am y kyfoeth+
aỽc gynt. ti a|gymereist da yn dy|vywyt. Rac ỻaỽ ỽynt a|e
kaffant. megys y|dywedir. Chỽi a|e keffỽch ar y ganvet.
veỻy yng|gỽrthỽyneb y hynny am bop drỽc o|r a|wnel dyn. ef