LlGC Llsgr. Peniarth 11 – tudalen 90r

ymchoelut. ac na|uit arnat un goual. Kanys y neb yd|ym ni yn

y wassanaethu a|n|dỽc ni odyma yn iach pan y mynno. ac ar

yr ymadraỽd hỽnnỽ ỽynt a|welynt yn|dyuot tu ac attunt dec mar+

chaỽc urdaỽl yn aruaỽc. y rei a erchis udunt ymroi. neu ỽyn+

teu a|veynt veirỽ. ac ỽynteu a|dywedassant yna nat ymroynt

yrdunt. Gan hynny heb ỽynteu neur|doeth aỽch diwed chỽitheu.

Ac yna brathu eu meirch tu ac attunt a|orugant. ac ỽynteu kyn

ny beynt namyn tri. a|heuyt ar eu traet. tynnu cledyfeu a|oru+

gant. a|pheredur yna a|drewis un onadunt. yny vyd hỽnnỽ y ar

y uarch y|r ỻaỽr. Ac yna peredur a|gymerth y march ac a esgynnaỽd

ac ueỻy heuyt y daroed y galaath wneuthur. ac yr aỽr y kaỽssant

y meirch ỽynt a|e kurassant yn gyn|ffestet ac y kafas bỽrt heuyt

varch. a|phan weles y ỻeiỻ hynny ỽynt a|ffoassant. ac ỽynteu a|e

hymlidyassant yny gaeassant y tỽr maỽr arnunt. A gỽedy dyuot

galaath a|e gedymdeithyon y neuad uaỽr a|oed yn|y kasteỻ. ỽynt a|w+

elynt yno ysgỽieryeit. a|marchogyon urdolyon yn|gỽisgaỽ arueu

ymdanunt achaỽs y cri a|glywynt ar|hyt y casteỻ a|r dref. Sef a|oruc

galaath yna a|e gedymdeithyon eu kuraỽ megys anniueilyeit. ac

ỽynteu a|geissyassant ym·amdiffyn. Eissyoes o|r diwed ef a oruu ar+

nunt ỽy ffo. A|galaath yna a|ymlauuryaỽd yn gymeint ac y teby+

gassynt ỽy nat oed ef wr bydaỽl. ac am na thygyei dim udunt ỽynt

a ffoassant y|r ffenestri ac y|r muryoed ac a ymoỻyngassant y dorri

eu mynygleu. A gỽedy daruot y|r tri chedymdeith ymrydhau y

ganthunt. edrych a|orugant ar y kalaned. ac ediuarhau arnunt

yn uaỽr gỽneuthur ohonunt gỽeithret mor bechaduryus a hỽn+

nỽ. Yna bỽrt a|dywaỽt. rof|i a|duỽ heb ef pei karei duỽ ỽynt o|dim