Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 73r

Ystoriau Saint Greal

73r

Pan gigleu bỽrt hynny. ef a|uedylyaỽd trigyaỽ y aros y tỽrnei+
mant. kanys ny aỻei vot na delei yno rei o gedymdeithyon y
vort ˄gronn. gan y rei agatuyd y gaỻei ef gaffael chwedleu y ỽrth y
vraỽt. Ac yna trossi a|wnaeth ef y|r ffo˄rd honno a|dyuot y ty meu+
dỽy a|oed gyfagos y|r fforest. ac ar|drỽs capel y meudỽy. ef a|ar+
ganuv y vraỽt yn aruaỽc. A|phan weles ef y vraỽt diruaỽr
lewenyd a|gyfodes yndaỽ. a|disgynnv y|r ỻaỽr a|oruc. a govyn o|e
vraỽt pa bryt y dathoed yno. a|lionel ny bu vaỽr yd attebaỽd idaỽ.
namyn dywedut. brt heb ef nyt erot ti na|m|ỻedit J. pan weleist
vi yn noethlumyn yn mynet gyt a|r|deu uarchaỽc urdaỽl. y rei
a|oedynt y|m maedu a|dyrneidyeu o drein. A|thydi a|m|gedeweist
J. ac a|aethyost y nerthau y vorwyn. ac ny wnaeth braỽt eiry+
oet ac araỻ chwareu waeth na ffyrnigach no honno. Ac o achaỽs
yr angkyỽirdeb hỽnnỽ ymogel di ragof|i megys rac dy elyn. ka+
nys ti a|heydeist dy angheu. ac am hynny ymogel ragof ac
nac ymdiriet ym. kanys myn duỽ ef a|vyd vn ohonam yn uarỽ.
P an gigleu bỽrt y vraỽt yn dywedut ueỻy. ef a|vu drỽc
ganthaỽ. ac a|ostyngaỽd ar|benn y deulin y erchi y na+
ỽd. ac erchi y duỽ uadeu y dryc·ewyỻys idaỽ. Ac ynteu a|dyng+
aỽd na|s madeuei. ac nat oed idaỽ waret namyn angheu os efo
a|vei drechaf. Ac yna esgynnu ar y varch a|oruc ef dan rybud+
yaỽ bỽrt. ac erchi idaỽ esgynnu ar y varch a|e amdiffyn e|hun
os gaỻei. ac onyt esgynny mi a|th ladaf ual yd|wyt. kyt boet
kewilyd ymi. titheu bieu y|coỻet. a|gỽeỻ yỽ gennyf|i gaffael
gogan y byt. no gadel gỽr kyndrỽc a|thydi yn vyỽ. Pan we+
les bỽrt vot yn reit idaỽ ymlad. drỽc vu ganthaỽ. a|medylyaỽ