Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 72r

Ystoriau Saint Greal

72r

y kythreul. A|mi a|dywedaf ytt pa delỽ. yr alarch yssyd yn|wynn
odieithyr. ac yn du o|r tu myỽn. veỻy y byd y diefyl y rei eu ky+
ffelybu y|r geugrefyd dynyon. y rei a|gymeront arnunt eu bot
yn|grevydus ac yn war. ac ỽynteu o|r tu vyỽn yn ỻaỽn dued o
bechodeu. ac yn sommi y byt. a|megys y doeth yr ederyn hỽnnỽ
y ymdangos ytti yn|dy gỽsc. ef a ymdangosses ytt wedy hynny
a thi heb gysgu. ac a|wdost ti pa le. pan ymdangosses y kythre+
ul ytt yn rith offeiryat. yr hỽnn a|dywaỽt ỽrthyt vot arnat be+
chaỽt am adel ohonat lad dy vraỽt o weith diodef. a|chelwyd
a|dywaỽt ef kanys ny las ef etto. ac y|mae yn|vyỽ hoỻ·iach.
ac ny dywaỽt ef hynny ỽrthyt ti namyn yr peri ytt syrthyaỽ
y|myỽn ỻit a godineb ac ym|pechodeu marỽolyon o achaỽs
y rei y paỻei arnat ti yn drag˄yỽyd welet seint greal. A|ỻyna ytti
pa|vn oed yr ederyn gỽynn. a|pha|un oed yr ederyn du. Beỻach re+
it yỽ dywedut ytt pa synhwyr yssyd y|r prenn drewyedic. ac y|r gỽi+
eil a|r|blodeu arnadunt. Y prenn coch drewyedic a|weleist di heb
nerth yndaỽ a|arỽydockaa lionel dy vraỽt. yr hỽnn nyt oes
yndaỽ na grym na nerth na gỽeithret da o·blegyt iessu grist.
drewedigrỽyd y prenn a|arỽydockaa drewedigrỽyd y pechodeu
yssyd yndaỽ ef. yn kynnydu beunyd o|r achaỽs y geỻir y gyffe+
lybu ef y brenn drewyedic. Ẏ dỽy gangenn a|weleist a|r blodeu
arnunt a|arwydockaa deu vorwyndaỽt. nyt amgen no|r march+
aỽc a|sarheeist|di yỽ vn. a vorỽyn yỽ y ỻaỻ. a|r neiỻ gangenn
a|oed yn mynnu ymgyhỽrd a|r|ỻaỻ. kystal yỽ hynny a|r mar  ̷+
chaỽc a|oed yn mynnu kyhỽrd a|r|uorỽyn o|e hamuod*Eissyo  ̷+
es gỽr da a|oed yn eisted yn|y gadeir a|wahanaỽd pob un y ỽrth y
gilyd.