LlGC Llsgr. Peniarth 11 – tudalen 67r

yr|oed y waet yn redec yn vỽy noc yng|kan|ỻe ar y|gnaỽt. Ac ynteu

heb dywedut un geir megys y neb a|vei yn ỻaỽn o gallon valch.

namyn diodef yn wraỽl yr hynn yd oedit yn|y wneuthur ac

ef. Ac yna bỽrt a vynnaỽd hỽylyaỽ o|e amdiffyn. A|phan yto+

ed ef ueỻy nachaf uarchaỽc urdaỽl aruaỽc o bop arueu yn

mynet y|r fforest. a morỽyn ieuanc ganthaỽ y|dreis. ac yn my+

net a|hi racdaỽ y deỽdỽr y fforest. a hitheu o hyt y ỻef yn ymgys+

tlỽn a|meir. ac yn erchi idi anuon nerth o|e morwyn. ac yr

aỽr y gỽeles hi bỽrt yn marchogaeth e|hunan. hi a debygaỽd

mae marchaỽc urdaỽl anturyus oed o|bererindaỽt y greal.

Ac yna hi a|waedaỽd arnaỽ o hyt y ỻef. ac a|dywaỽt. tydi

varchaỽc urdaỽl heb hi yr y gret a|rodeist di y|r|gỽr yd ỽyt ar y

wassanaeth. ac yr y gret a|dylyy ditheu idaỽ ynteu. na at

y|r|marchaỽc hỽnn vyng|gỽaradỽydaỽ ~ ~ ~ ~  

P an|gigleu bỽrt hynny ef a vedylyaỽd na wydyat

beth a|wnaei ae ysgaelussaỽ o|e|nerthau. ae peidyaỽ.

diheu oed ganthaỽ ynteu y coỻi* hi y heneit o|e|diffic ef. os

ynteu a ysgaelussei y vorwyn a|oed yn ymgystlỽn ac ef yr mỽ+

yn y neb yr|oed yn|y wassanaethu. o r kaffei hi gewilyd y kaffei

ynteu angklot a choỻet o ryỽ fford o achaỽs diffic y nerth ef.

Yna ef a|dyrchafaỽd y lygeit tu a|r nef dan|wylaỽ. ac a|dywa+

ỽt. Arglỽyd iessu grist dat hoỻgyuoethaỽc. y gỽr yd ỽyf|i yn|y

wassanaeth. cadỽ ym vym mraỽt rac y|lad o|r gỽyr racko. a

minneu a|af y amdiffyn dy vorỽyn ditheu. Ac yna brathu

march a|oruc ef yn ol y marchaỽc a|r uorwyn. a|phan y godiỽ+

edaỽd ef ỽyntỽy. ef a|dywaỽt. tydi varchaỽc adaỽ yna y vorỽyn.