Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 50ar

Ystoriau Saint Greal

50ar

hidyl a|hynny. ef a vu dost ganthaỽ. ac a|gyfarchaỽd gỽeỻ i+
daỽ. ac a|dywaỽt duỽ a|th gatwo rac drỽc wrda. amen heb y gỽr
kanys ony|m keidỽ y mae arnaf ovyn y gorvydir arnaf yn
ehegyr. a|duỽ a|th gatwo ditheu hevyt rac dy bechodeu kanys
reidyach yỽ ytt. noc y varchaỽc urdaỽl o|r a|atwaen j. Pan
gigleu laỽnslot hynny ef a vedylyaỽd y disgynnei. ac nat
aei o|e gynghori y ỽrth y gỽr y dyd hỽnnỽ. kanys yttoed yn
y adnabot yn herwyd y parabyl a|dywedassei. Ac yna dynes+
sau tu a|r|ty a|oruc ac arganuot ar y drỽs debygei ef gỽr
prud ỻwyt yn varỽ a|chrys ymdanaỽ. A|gỽedy disgynnu o+
honaỽ ef a|eistedaỽd yn ymyl y gỽr ac a|ovynnaỽd idaỽ pa
angheu a|dugassei y gỽr a|oed yn varỽ a|r crys ymdanaỽ. ac  ̷
a|e|beis raỽn ym|peỻ y ỽrthaỽ. Nys|gỽnn heb y gỽr namyn
tybyeit nat o·blegyt duỽ y bu uarỽ. a thorri ohonaỽ bỽngk
ar y greuyd pan vỽryaỽd y beis raỽn y ỽrthaỽ. a|chymryt
y|crys. ac yn|y medỽl hỽnnỽ y odiwedut o|r gỽas drỽc ef. a
dỽyn yr eneit y|ganthaỽ. ac ys maỽr a|ryssynt yỽ. kanys y
mae deng|mlyned ar|hugeint yr|pan yttiỽ yn gỽassanaethu duỽ.
Ac yna y gỽrda|a|aeth y|r capel y myỽn. ac a|gymerth ystol ac
a|dynnaỽd ỻyfyr o|e vynwes ac a|e|darỻeaỽd. A|gỽedy daruot i+
daỽ darỻein talym o|r ỻyfyr. ef a|welei y gỽas drỽc geyr y vronn
yn hackraf neb ryỽ eilun o|r byt. Ac yna y kythreul a|dywaỽt
y ba|ryỽ beth heb|ef y|ỻauuryeist di vyvi yma. Y|dywedut ym
heb y|gỽr pa ffuryf y|bu uarỽ y gỽrda hỽnn a|oed gedymdeith
ym. ac y uenegi beth a|daruu o|e eneit. Ac yna y kythreul a
atebaỽd idaỽ yn aruthur jaỽn ac a|dywaỽt y odiwedut ym
pỽngk da.