Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 49v

Ystoriau Saint Greal

49v

y gỽr da a|anuones att vraỽt a|oed idaỽ. Ac a|erchis idaỽ anuon
march ac arueu y varchaỽc urdaỽl anghyflyryus a|od* ygyt ac
ef. ac ynteu a|e hanuones. A gỽed˄y kael o|laỽnslot pob peth o|r a
oed yn eissyeu idaỽ. ef a|aeth ymeith drỽy gennyat y|gỽrda. ac
a uarchockaaỽd drỽy r fforest yny|oed yn aỽr brim. Ac yna ef a
gyuaruu ac ef was jeuanc yr hỽnn a|ovynnaỽd idaỽ o pa|le pan
oed yn|dyuot. A|laỽnslot a|dywaỽt mae o|lys arthur yr oed yn
dyuot. Pỽy dy henỽ di heb ynteu. Ef a|m gelwir i laỽnslot
dy lac. Laỽnslot dy lac heb y gỽas nyt hỽnnỽ yd yttỽyf|i yn|y
geissyaỽ. kanys ny ỽnn yn|yr hoỻ vyt vn dyn aflỽydyannus+
sach na|direidyach no thi. A vnbenn heb·y|laỽnsot beth a|wdost
di. Gỽnn heb ynteu panyỽ tydi yỽ yr hỽnn yr ymdangosses se+
int greal idaỽ. ac yr hynny ny wyr duỽ ytti symudaỽ vn cam o|r
ỻe yr oedut. ac yn|wir yna ti a|dangosseist nat oedut ỽrda. na
marchaỽc urdaỽl kywir. namyn vn ffa˄lst anghyfyaỽn pryt
na mynnut wneuthur chweith anryded y|th arglỽyd. Ac na
vit ryued gennyt ti o|r kyuerfyd kewilyd a|thi yn|y bererin+
daỽt honn yn annat neb. Pan y kigleu laỽnslot ef yn|dyw+
edut ueỻy tristau yn vaỽr a|oruc kanys gỽydyat y vot yn
gamgylus. ac ỽylaỽ yn|hidyl a|oruc ac adaỽ y gỽas yno. a
marchogaeth yn vedylgar drist yny vu hanner dyd. Ac yna
ef a arganuv gudugyl meudwy a|thu ac yno y trosses ef. a
gỽedy y dyuot yno ef a|welei wr creuydus pruddrist medyl+
gar. yn eisted yn ymyl y capel. Ac yn|dywedut. arglỽyd ies+
su heb ef. paham y diodefeist di hynn. kanys ef a|vu y|th w+
assanaethu yn|hir. A|phan y gỽeles laỽnslot ef yn wylaỽ mor