Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 276v

Ystoriau Saint Greal

276v

A ryued uu ganthunt na welynt neb yn dyuot o|r casteỻ yn
eu hol. Meliot heb·y gỽalchmei ti a|m rydheeist i o angheu
yr aỽrhonn. ac vn weith araỻ heuyt. ac nyt ym·gedymdeithe+
eis eirmoet a marchaỽc a|wnelei ym o|les gymeint ac a|wna  ̷+
ethost di. Ac yna marchogaeth a|orugant yny doethant yn
agos y|r casteỻ. ac ny chlywynt ỽy yno neb ryỽ son o|r byt. ~
Ac ny welynt neb yn dyuot ohonaỽ. A ryued vu ganthunt
na|welynt neb yn dyuot yn eu hol. a marchogaeth a|orugant
ỽy yny doethant y benn y fforest ual y gỽelynt y mor yn a+
gos udunt. ac yno wynt a|welynt long. ac a|welynt varcha+
ỽc urdaỽl yn ymguraỽ a chwbyl ac a|oed ygyt ac ef. ac yd
oed y marchaỽc yn eu curaỽ yn gyn ffestet ac yny ytoed
lawer onadunt yn syrthyaỽ y wysc eu penneu y|r mor. a
thu ac yno y doethant ỽy gyntaf ac y gaỻassant. A|phan
doethant ỽy yn agos yn agos y|r mor. wynt a adnabuant
panyỽ paredur a|oed yn ymguraỽ ac ỽynt. A|chynn eu
dyuot ỽy y lann y mor. yr oed y ỻong gỽedy peỻau yn|y
weilgi. ac ynteu vyth yn ymguraỽ a|phaỽp ac a|oed yn|y ỻong.
Meliot heb·y gỽalchmei. weldy|racko paredur. a mi a aỻ+
af dywedut yn ỻe gwir y vot ym perigyl maỽr am y ene+
it kanys y ỻong racko a|deflir y ryỽ dir ny chlywer vyth
un chwedyl y ỽrthaỽ o·nyt duỽ a ymgeleda am·danaỽ
ac o|choỻir ef mi a aỻaf dywedut na|chynyda marchaỽc
vyth ar gret grist yn|gymeint ac efo. Gwalchmei a|we+