LlGC Llsgr. Peniarth 11 – tudalen 274r
Ystoriau Saint Greal
274r
varchaỽc urdaỽl yn|eu harueu yng|croc ym|bric prenn. A ry+
ued uu ganthaỽ hynny. A vnbennes heb·y meliot pỽy a lada+
ỽd y marchogyon racko mor vileinyeid a hynn. Arglỽyd ~
heb hi y marchaỽc o|r galis yr hỽnn yssyd yn mynnychu y|r
mor. Paham heb ef ef y croget ỽyntỽy. am eu bot yn credu
y duỽ ac y vam. ac yma y byd reit ymi eu|gỽarchadỽ ỽyntỽy
hyt ym|penn y deugeinuet dyd. rac eu tynnu odyma. ka+
nys pei|tynnit ỽy ef a|goỻei y gasteỻ medei ef. ac ynteu a
torrei vym|penn i. Myn vyng|cret heb·y meliot ys milei·nye+
id a|swyd yssyd ytt. ac ny bydy di mỽy yn|y mod hỽnnỽ. Och
arglwyd heb hi ef a|m|ỻedir inneu. kanys kyn greulonet
yỽ y marchaỽc ac nat oes neb a aỻo parhau yn|y erbyn. A
vnbennes heb·y meliot maỽr a gewilyd oed y mi o|r|gadỽn y
marchogyon urdolyon yn|y mod Racko. ac ef a|liwit y uarch+
ogyon ereiỻ hynny. Yna meliot a|e tynnaỽd ỽyntỽy y|r ỻaỽr
ac a|e cladaỽd. Arglỽyd heb y vorwyn ony medylyy di am vyng
gwarantu i y marchaỽc a|m ỻad. ac auory y bore pryt na
welo ef ỽyntỽy yng|croc. ef a|chwilya y fforest y|m keissyaỽ J
yny|m kaffo ac odyna ef a|m|ỻad. ac odyna meliot a gerdaỽd
ar hyt y fforest ef a|r uorwyn yny|doethant y gapel yn|y ỻe y
gnottaey vot meudỽy yr|hỽnn a|daroed y|r marchaỽc o|r galis
y distrywyaỽ. ac yno ef a|disgynnaỽd. ac a|doethant ef a|r vorw+
yn y myỽn yn|y ỻe yd oed amylder o oleuni. a morwyn araỻ
a|oed yno yn|gỽylyaỽ marchaỽc marỽ. a ryued vu gan|veliot
| « p 273v | p 274v » |