LlGC Llsgr. Peniarth 11 – tudalen 270r
Ystoriau Saint Greal
270r
yn dri broder. ac ỽynt a gandeiryogant yr aỽr y|th welont.
ac odidaỽc oed y dyn edrych ar y ryỽ wyrtheu hỽnnỽ. kanys
iaỽn yỽ y baỽp ar ny chretto y duỽ vynet odieithyr y synnwyr
pan|welo peth oblegyt duỽ. Paredur yna a doeth yn aruaỽc
y|r neuad y vyny yr yroed* y vorwyn yn|y dywedut. a|hitheu yn|y
ol ynteu. Y trywyr yna a|arganuu baredur yn|y|arueu. a|r
groes yn|y daryan. ac a|neidyassant y vyny o·dieithyr eu syn+
nwyr ac yn|gandeirogyon. a phob vn yn ymdidan a|e gilyd
ac yn brefu megys dieuyl. ac yna ỽynt a|gymerassant gisarme+
u a|chledyfeu. ac a vynnassant hỽylyaỽ y baredur. Eissyoes
nyt ytoed duỽ yn gadel udunt ỽy argywedu idaỽ ef. ac yna
pryt na aỻassant ỽy hỽylyaỽ y baredur pob un a|hwylaỽd
y gilyd onadunt. ac ymlad a|orugant yny ladaỽd pob vn y gil+
yd heb vynnu bot ỽrth orchymynneu y vorwyn.
P aredur yna a edrychaỽd ar y gỽeissyon pob vn yn
ỻad y gilyd. ac a vedylyaỽd panyỽ maỽr oed y gỽyrth+
eu hynny. ac a|weles y vorwyn yn|drist iaỽn. ac yn wylaỽ. A
unbennes heb·y paredur nac wyl dim. namyn ediuaret ar+
nat y gamgret y buost yn|y chynnal hyt yr aỽr·honn. kan+
ys paỽp ar ny mynnont credu y|n duỽ ni y maent megys yn+
vydyon ac o·dieithyr eu|synnwyr ac yn gandeirogyon me+
gys dieuyl. Paredur yna a|beris y|r gỽeissyon vỽrỽ kyrff
y rei meirỽ aỻan. ac eu bỽrỽ myỽn avon redegaỽc a oed yn
agos yno. a phan daruu hynny ef a|ladaỽd kỽbyl o|r|a|oed ~
| « p 269v | p 270v » |