Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 243v

Ystoriau Saint Greal

243v

bu uarỽ y vrenhines. Ac ynteu yssyd nessaf etiued idi hi.
ac o˄ny mynny di wneuthur hynny. ỻyma efo drỽ·ydof|i y|th ry+
budyaỽ di y ymoglyt racdaỽ ef megys yr hỽnn y mae yn|dỽ+
yn y dref tat y ganthaỽ. kanys y mae yn elyn ytt o|dwy fford.
vn yỽ o achaỽs y vort gronn yr honn yd wyt ti yn|y chynnal
yng|kam. a|r ỻaỻ am dy vot yn credu y|r gret newyd. ac y|mae
ef yn|dywedut drỽydof|i. os tydi a vynn ymadaỽ a|r gret honno.
a|chymryt brenhines laudyr y chwaer ef yn|wreic briaỽt yt.
ynteu a at yn ryd ytt y vort gronn ac a vyd nerth ytt ym
pop|ỻe. ac ony wney di ueỻy nac ymdiryet ti yndaỽ efo.
ac ar hynny y|marchaỽc a|aeth ymeith. ac arthur a|drigya+
ỽd yno yn vedylgar. A|gỽedy daruot bwyta ef a|gyuodes y
vyny. ac a|alwaỽd attaỽ walchmei a laỽnslot a chỽbyl o|e vil+
wyr y|gymryt kynghor. Arglỽyd heb·y gỽalchmei ˄ti a amdif+
fynny dy gyuoeth yn oreu ac y geỻych a ninneu a|th gymhor+
thỽn di ar orthrymu dy elynyon. Brytaen vaỽr yssyd etto
ar dy ewyỻys di. heb goỻi ohonat ohonei etto na thref na
chasteỻ. a briant o|r ynyssed ny losges etto onyt y·chydic o|r
wlat. ac nyt coỻet maỽr hynny etto. ac ef a|eỻir peri idaỽ e+
mendau hynny. ac osit y vrenhin magdalans a|ỻu maỽr
y ryuelu arnat ti tu a|r occident. anuon ditheu y|rei goreu
o|th vilwyr y amdiffyn dy wlat racdaỽ ef. ~  
Y ng|kaer ỻion y bu arthur yn gorffowys yn hir ac|yn
credu y|duỽ ac y|r arglỽydes veir. ac ef a|dugassei exaỽm+
pyl