Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 238v

Ystoriau Saint Greal

238v

ac ef a|wnaeth ỻes maỽr idaỽ vot delỽ veir gyuerbyn|a|r ysgrin.
Ac yna gostỽng ar dal y linyeu geyr|bronn y|delỽ a|wnaeth ef.
a|e ogỽyd ar yr ysgrin megys y tybyit arnaỽ efo panyỽ adoli
y|r delỽ yr oed. ac yna roi y wyneb a|e eneu ỽrth yr ysgrin a|e chỽy+
naỽ yn|y mod hỽnn ~  ~  
A Rglỽydes heb ef pany bei rac ovyn gogan y gan y bobyl
nyt aỽn i odyma vyth ac yma y trigyỽn y iachau vy e  ̷+
neit. ac y wediaỽ dros y teu|ditheu. a digrif oed gennyf vot
yn|y ỻe y gỽelỽn dy ysgrin|di. Och duỽ kannatta ym vy ma+
rỽ yn ehegyr. a dyuot ym vy angheu yn|y ryỽ le y gaỻwyf ~
gael vyng|cladu yn|y capel hỽnn. a|r nos a|doeth. ac vn o|r ys+
golheigyon a|dywaỽt y|r meudwyeit na welsynt eiryoet
dyn vn garedigrỽyd y wediaỽ duỽ ac oed y marchaỽc a|oed
yn|y capel. ac vn o|r meudwyeit a|dywaỽt nat oed yn|y byt
dynyon vỽy a|garei duỽ no rei o|r marchogyon urdolyon.
Ac yna ỽynt a|doethant y|r capel y erchi y laỽnslot dyuot y vỽ+
yta. ac odyna y orffowys. ac ynteu a|dywaỽt na|bỽytaei
dim y nos honno. kanys ef a|vỽytayssei o|r blaen. ac yma
heb ef y trigyaf|i hyt a·vory y wediaỽ geyr bronn delỽ veir. a|r
gỽyrda nyt archassant idaỽ mỽy. namyn dywedut y vot yn
wr|da y vuched. Yno y|bu laỽnslot y nos honno hyt trannoeth.
a|r|bore drannoeth y meudwyeit a ymbaratoassant y ganu
eu|gỽassanaeth. ac yno y bu ef yny daruu y teir offeren. A
phan|daruu udunt ỽy canu offerenneu laỽnslot a gymerth