LlGC Llsgr. Peniarth 11 – tudalen 233v

Yma y mae yr ymdidan yn tewi am arthur a gỽalchmei ac

yn trossi ar vab y marchaỽc o|r ty atueilyedic y|r ỻe y duc y bi+

theiat walchmei. ~  

T Raethu y|mae yr ymdidan yma vot mab da y|r march+

aỽc o|r ty atueilyedic. a|e henỽ oed melianus yr hỽnn

nyt ebr·y·vygaỽd angheu y|dat. ef a gigleu vot briant o|r yn+

yssed yn wr kadarn gaỻuaỽc. ac yn ryuelu yn erbyn arthur.

ef a doeth tu ac yno. ac a|dywaỽt idaỽ pa|delỽ y daroed y laỽnslot

ỻad y dat. ac a|adolygaỽd idaỽ y wneuthur yn varchaỽc urda+

ỽl. kanys chwannaỽc oed y dial y|dat. ac ef a|e kymhorthei

ynteu o gynnal y ryuel. yn|oreu ac y gaỻei. Yna briant a|e

gỽnaeth yn varchaỽc urdaỽl. ac yr|oed yn|was tec herỽyd y

oetran. ac yn|chwannaỽc y welet laỽnslot. a ryued oed gan+

thunt yn|y wlat beth a|daroed idaỽ. ac yr|oedynt yn tybyeit

daruot y|lad neu y varỽ ynteu. Eissyoes ny daroed idaỽ efo yr

vn o|hynny. namyn iach oed ef a|ỻaỽen pany bei y vot yn

drist am varwolyaeth gỽenhỽyuar. a|r tristit hỽnnỽ nyt

yttoed ef yn gaỻel y ysgaelussaỽ. a megys yr|oed ef diwarnaỽt

yn marchogaeth. ef a|odiwedaỽd morwyn ieuanc yr|honn a

oed yn canu a diruaỽr lewenyd genthi. ac yn dywedut. Myn

duỽ medei hi os y|marchaỽc yma a|e mynn mi a|ỽnn ỻe y

keiff ef letty da heno. a vnbennes heb·y laỽnlsot ỻetty da

a|oed reit y minneu ỽrthaỽ. kanys blin a|ỻudedic ỽyf. veỻy

heb hi y gỽeleis baỽp o|r a|delei o|dir brenhin peleur. kanys

ny aỻei neb odef poen a|thrauael ony bei y vot yn varchaỽc da.

A|vnben heb hi weldyma dy fford di heb y groes yssyd o|th|vlaen.