LlGC Llsgr. Peniarth 11 – tudalen 210v

erbyn dyrnaỽt y gỽaeỽ yny losges hyt y|dỽrn. A|r marchaỽc yna

a|ossodes ar|benn paredur a|e gledyf. Eissyoes paredur a ymgudy+

aỽd yng|kysgaỽt y daryan yn|yr|honn yd oed y obeith ef. hyt

na aỻaỽd y cledyf chweith argywed o|r|byt y|r daryan. Joseph yssyd

yn tystolyaethu panyỽ ioseph o arimathia a barassei roi y|my+

ỽn bogel y daryan peth o waet iessu grist. ac o|r wisc a|vuassei

ymdanaỽ. A phan weles y ỻeidyr na aỻei aflessu paredur na|r da+

ryan. ef a lidiaỽd yn vaỽr. kanys ny rodassei ef eiryoet dyrnaỽt

y uarchaỽc ny bei uarỽ arnaỽ. Ac yna troi a|oruc ef penn y

dreic a|e daryan ar vedyr ỻosgi taryan baredur. Eissyoes y fflam

a doeth o benn y dreic parth a|tharyan paredur a ymchoelaỽd dra+

chevyn yn|y gỽrthwyneb megys pei gan wynt y troei. heb aỻel dy+

uot yn erbyn paredur. ỻidiaỽ yna a|oruc y marchaỽc a|dyuot racdaỽ

hyt y ỻe yd|oed y marchaỽc marỽ ar yr elor. a|throi penn y dreic

tu ac attaỽ a|wnaeth. a goỻỽng fflam yny losges yn|ỻudỽ. am gla+

du hỽnn heb ef ỽrth baredur yr ỽyt yn ryd. Yn ỻe gỽir heb·y paredur

drỽc a|beth yỽ gennyf|i hynny. a minneu a|e diolchaf ytti yn ỻaỽ+

en. Y vorwyn a|dathoed y·gyt a|pharedur yno a|oed ar vn o|r bylcheu

ygyt a|r arglỽydes yn edrych. ac a|dywaỽt o hyt y ỻef. Paredur

heb hi ỻyna y kewilyd yn vỽy. Kewilyd vu gan baredur welet ỻos+

gi y geuynderỽ yn ỻudỽ yn|y wyd. ac a weles vot gyt a|r marcha+

ỽc nerth kythreul. ac ny wydyat yn|y byt pa ffuryf y gaỻei dial

arnaỽ hynny. Ac yna ef a|doeth tu ac attaỽ. a|e gledyf yn noeth

yn|y laỽ. ac ym|bric y daryan a|e trewis yny hyỻ hyt y pherued yn|y

ỻe yd|oed penn y dreic. yny goches cledyf paredur yn gyn gochet a

chledyf y marchaỽc. a|r vorỽyn yna a|dywaỽt o hyt y ỻef. arglỽyd