Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 20v

Ystoriau Saint Greal

20v

a ỻyna vyvi gỽedy dywedut ytti synhwyr yr anturyeu a
gyfaruuant a thydi. ~ ~ ~  ~ ~ ~  
T Rannoeth y bore gỽedy daruot y galaath gỽaran+
daỽ offeren. ef a|gychwynnaỽd ymeith drỽy gen+
nat melian a|r myneych. ac a|uarchoges ỻawer o diwar+
nodeu. A diwarnaỽt ef a|gychwynnaỽd o|ty gỽr mỽyn. ac
yn|drỽc ganthaỽ na chaỽssoedyat y dyd hỽnnỽ chweith o
offeren. A gỽedy marchogaeth talym ef a|arganvu ca+
pel. a|thu ac yno y doeth. ac nyt oed chweith diwyỻ arnaỽ.
yr hynny ual kynt ef a|ostynghaỽd ar|benn y|linyeu. ac
a|erchis y|duỽ gynghor. A gỽedy daruot idaỽ y wedi. ef a
glywei lef yn|dywedut ỽrthaỽ. Tydi varchaỽc urdaỽl an  ̷+
turyus. dos yn unyaỽn y gasteỻ y morynyon y|diua yr an  ̷+
turyeu drỽc yssyd yno. A|phan|gigleu ef hynny. diolỽch y
duỽ a|wnaeth ef am vot yn wiỽ ganthaỽ y rybudyaỽ.
Ac yna esgynnv ar y uarch a|oruc a|marchogaeth yny
welei gasteỻ tec y|myỽn glynn. ac auon uaỽr yn redec
trỽydaỽ yr honn a|elwit hafren. a|thu ac yno y kyrchaỽd.
ac y kyfaruu ac ef gỽr prud. ac nyt oed gyweir o diỻat.
a|r gỽr a|gyvarchaỽd gỽeỻ idaỽ. a galaath a|attebaỽd idaỽ
yn|y mod goreu o|  y|gaỻaỽd. a|govyn idaỽ pa|delỽ y ge+
lwir y kasteỻ racko   heb ef. ac ynteu a|dywaỽt mae cas+
teỻ y morynyon y gelwit ef. a|phaỽb o|r yssyd yndo yssyd ang+
hyflyryus. canys nyt oes yndaỽ chỽeith trugared. a|thu
ac yno y kyrchaỽd ef yny welei gỽas ieuanc yn dyuot y
wahard y fford racdaỽ. kanys nyt oes yma|heb|ef chweith
fford da.