Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 205v

Ystoriau Saint Greal

205v

heb·y paredur. weldy yma wr y ymlad a|thydi drossof|i. Yna y mar  ̷+
chaỽc herỽr a|trewis y marchaỽc cachyat ym|perued y daryan
yny dyrrr* y baladyr yn dryỻeu. Eissyoes. ny chyfaruu a|r
marchaỽc cachyat dim drỽc. Ac yna tynnv y gledyf a|wnaeth
yr herỽr. a|r cach·yat a|edrychaỽ* o bop|parth idaỽ. ac ef a|ffoas+
sei yn|ỻawen pei as|ỻyfassassei rac paredurac yna paredur a
dywaỽt ỽrthaỽ. vy marchaỽc i heb ef ỻafurya y iachau vy
enryded i a|r morynyon a|th eneit titheu. y marchaỽc araỻ yn+
teu yn roi dyrnodeu creulaỽn trymyon idaỽ. ac ynteu y+
n|y diodef. a ryued vu gan baredur rac mor gachyat oed. a|r
herỽr eissyoes nys ysgaelussaỽd ac a|roes dyrnaỽt maỽr idaỽ yn+
y vriwaỽd yn drỽc. Yna y marchaỽc cach·yat a dywaỽt pan
weles y waet yn coỻi ỽrth y ỻaỻ. Myn vyng|cret i heb ef. ny the+
bygassỽn i vot y|th vryt ti vy ỻad i. ac ef a|vyd ediuar ytti hyn+
ny. ac yna estynnu y waeỽ y ỽrthaỽ a|tharaỽ y varch a|dỽy yspar  ̷+
dun. a|dyuot tu ac attaỽ a|e daraỽ ym perued y daryan yny vyd
y gỽaeỽ trỽydi a|thrỽydaỽ ynteu yny vyd y|r ỻaỽr dan draet
y varch. ac yna disgynnu a|wnaeth ef a diosc y helym. a thor+
ri penn y marchaỽc a|e roi yn anrec y baredur. a|dywedut ỽr+
thaỽ. Arglỽyd ỻyma o|r ymwan kyntaf a|wneuthum i eiryoet.
Gỽeỻ yỽ ueỻy heb·y paredura|mogel rac ỻettyaỽ cachodrwyd na
ỻyvyrder ynot o hynn aỻan vyth. Gwir a|dywedy arglỽyd heb
ynteu. ny thebygassỽn i aỻel vyng|gỽneuthur yn|deỽr vyth. a
phei as|tebygassỽn mi a gaỽssoedỽn o enryded o|m bot yn deỽr
ac yn ehovyn mỽy noc o|m bot yn|gachyat ac yn ỻỽfyr. Gwir a
dywedy heb·y paredur. Jawnach yỽ anrydedu y gỽyr da no|r rei
drỽc.