Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 204v

Ystoriau Saint Greal

204v

a doeth a|dyrneit o wial ganthaỽ. ac a vaedaỽd y groes dan wy  ̷+
laỽ yn hidyl. Ryued vu gan baredur hynny a|dywedut ỽrthaỽ.
Paham y gỽney di y mileindra hỽnnỽ a|r groes. ac nyt tebic
di y|r offeiryat racko. Nyt reit ytti didarbot beth a|wnelwyf|i
heb ynteu. ac y gennym ninneu nys|gỽybydy di. Paredur
eissyoes a|lidiassei ỽrthaỽ pany|bei y vot yn offeiryat ~  
M ynet ymeith ar|hynny a|oruc paredur. ac ny marcho+
caaỽd ef haeach yny gyuaruu y marchaỽc urdaỽl
cachyat ac ef. yr|hỽnn a|erchis idaỽ o|beỻ y naỽd. Pa|ryỽ wr
yttỽyt ti heb·y paredur. Arglỽyd heb ynteu y marchaỽc ur+
daỽl cachyat y|m gelwir i. a|gỽassanaethỽr ỽyf|inneu y voryn+
nyon y gadeir. ac yr duỽ yr archaf|i ytti na chwyfych ỽrthyf.
kanys clot bychan yỽ taraỽ dyn ny lyuasso ym·amdiffyn.
Paredur a|e gỽeles yn wr maỽr tec ar gevyn y uarch. ~
Paham heb·y paredur yd ỽyt aruaỽc ditheu. a|th gallon yn gyn+
drỽc a|hynny. O achaỽs mileindra ryỽ rei heb ynteu kanys y|mae
ryỽ rei a|m ỻadei i yn ehegyr peit veỽn heb ˄arueu amdanaf. Ae kyn+
drỽc dy gallon di ac y dywedy heb·y paredurMyn|duỽ heb ynteu
ys gỽaeth. Myn vyng|cret i heb·y paredur mi a|th wnaf di yn|var+
chaỽc ehovyn dewr a|dabre di gyt a|mi. kanys gouit maỽr yỽ
bot cachyatrỽyd a|ỻyfyrder yn gorffowys myỽn gỽr kyn decket
a|thydi. Ac am hynny myui a vynnaf newidyaw o+
honat ti dy henỽ. kanys ry vily·einyeid a|ry gewily+
dyus yỽ gennyf|i a chan bop marchaỽc o|r a aỻer dim ac ef
yr henỽ yssyd arnat ti yr aỽrhonn.  Wrth hynny tith+
eu a|m ỻedy i yn gyntaf heb y mar  chaỽc cachyat. ac
ny mynnaf|i arglỽyd newidyaỽ na|m henỽ na|m medỽl.