Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 197r

Ystoriau Saint Greal

197r

arthur hynny. a chan gỽbỽl o|r ỻys. Ac arthur a alwaỽd
ar gei. ac a|roes ỻawer o tir a dayar idaỽ. o dybyeit y vot
yn dywedut gỽir. a thrannoeth y bore ef a|doeth yma ~
vorwyn ieuanc. ac a|dywaỽt y mi hynny. ac a|deuthum inneu
yno. ac rac meint oed y kaỽr ny lyuesseis i vynet yn
agos idaỽ. a gỽedy hynny hi a|m duc i y|r ỻe yr oed ỻacheu.
A hi a erchis y mi yn|tal y ỻauur y penn. a minneu a|e
kannateeis idi. a hitheu a|e kymerth ef ac a|e|dodes myỽn
prenuol a|oed genthi. gỽedy y gỽeryaỽ* o odidaỽcweith a
mein maỽr·weirthyaỽc. A gỽedy hynny hi a|m kymhorth+
es inneu o|dwyn y corff hyt yma o|e|gladu. a gỽedy dar+
uot hynny hi a|aeth ymeith. ac nyt yttỽyf|i arglỽyd yn
dywedut hynny yr mynnu y wybot o|arthur. kanys ef
a|wnaei drỽc y gei yn ehegyr a|r pechaỽt a vydei arnaf|i. ~
Arglỽyd heb·y paredur maỽr a|ovit yỽ marỽ ỻacheu yn|y mod
hỽnnỽ. rac daet oed defnyd milỽr o·honaỽ. a|phei gỽypei ar+
thur ar gei hynny. yr hỽnn nyt caredic eissyoes gan ~
neb o|r ỻys. ef a|goỻei y ỻys a|e eneit heuyt o cheffit ỻe ỻaỽ
arnaỽ. Yno y bu baredur y nos honno. a|thrannoeth gỽedy
offeren ef a|aeth ymeith. ac a|varchockaaỽd drỽy fforestyd
dan damunaỽ chwedleu y ỽrth y vam a|e chwaer. ac ar|hyn  ̷+
ny ef a welei vorwyn ieuanc o|e vlaen dan vric prenn. a|r
griduan mỽyaf o|r byt genthi ar dal y deu·lin a|e hwyneb
tu a|r|dwyrein. ac yn|dyrchafael y dwylaỽ tu a|r nef ac yn
garedic yn gỽediaỽ ar y harglỽyd ar anuon nerth idi
yn ehegyr herwyd nat oed yn|y byt dyn reidyach idi ỽrth
nerth no hi. Yna paredur a|safaỽd yng|gỽasgaỽt y fforest