Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 194v

Ystoriau Saint Greal

194v

urdaỽl yn|dyuot ar vrys ar hyt y fforest megys dyn dechryne+
dic o ovyn. Paredur yna a|o·vynnaỽd idaỽ o ba|le yr oed yn
dyuot. Arglỽyd heb ynteu o fforest y ỻadron. y rei a|m hymlit+
yassant Mỽy no miỻtir y geissyaỽ vy ỻad. ac ỽynt a|ymchoel+
assant drach|eu kevyn att varchaỽc urdaỽl a|oed myỽn ty
ganthunt yr hỽnn a|wnathoed udunt ỽy lawer o gewilyd
a choỻet o|r rei eidunt. kanys ef a grogassei pedwar onadunt.
ac a|ladaỽd vn a|r vorwyn|deckaf o|loegyr. a|hi a|e haedassei. ka+
nys hi a|chorr a|lettayssynt y marchaỽc hỽnnỽ o|e|lad. A|wd+
ost ti heb·y paredur pa|ryỽ varchaỽc yỽ ef. Na|ỽnn heb ynteu
kanys ny chefeis i enkyt y ymovyn ac ef. namyn hynn a
ỽnn i panyỽ o eissyeu bỽyt yn|y ty y mae efo wedy dy·uot aỻ+
an megys ỻeỽ kandeiryaỽc. Ac y·gyt a hynny heuyt ny bu  ̷+
assei ef yn|y ty yn gyhyt a|hynny pany bei y vrathu yn deu|le
ac ny bu iach hyt yr aỽr·honn. a heuyt am nat oes varch
idaỽ. A|phan|wybu ef y vot yn iach. ef a|doeth aỻan yn eu mysc
yỻ pedwar ỻeidyr. y|rei oed arnunt y ovyn yn gymeint ac
na lyuessynt y gyrchu. eissyoes ỽynt a|deuynt yn agos idaỽ
ef. nyt oed wiỽ ganthaỽ ynteu vynet na cherdet ar y dra+
et. ny deuynt ỽynteu mor agos idaỽ ac yr ym·gaffei ac vn
onadunt. a|phei delynt pan vei waethaf ef a|vynnei vn o|r
meirch. A vnben heb·y paredur ỽrth y marchaỽc duỽ a|da+
lo ytt dy chwedleu. Arglỽydi heb y marchaỽc godefỽch y gen+
nyf|i vynet y·gyt a|chwi y edrych ae|distriỽ y gỽyr drỽc hyn+
ny. Ni a|th odefỽn yn ỻaỽen heb ỽynteu. Arglỽyd heb y
marchaỽc urdaỽl tlaỽt yr|hỽnn y gỽeleist di y morynyon
tlodyon yn chwioryd idaỽ yn|y casteỻ tlaỽt yn|y ỻe y kysge+
ist