Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 168v

Ystoriau Saint Greal

168v

ac att y marchaỽc. A dywedut ỽrthaỽ. tydi uarchaỽc heb ef ym+
gud yng|kysgaỽt dy daryan ual yd ỽyf|ineu. kanys yd ỽyf y|th
rybudyaỽ. dieithyr na ladaf|i dydi. a|duỽ a wnel ym dy gael yn
gyn|ffyryfet ac y gaỻwyf broui vy nerth arnat. kanys ny ỽnn
i yr ys|talym pa ryỽ wyf. Ac ar hynny y daraỽ a|oruc ef y|mogel
y|daryan yny yttoed y marchaỽc yn coỻi y|warchafleu. ac yny
yttoed ynteu hebdaỽ ef ym|peỻ. A ryued vu gan y marchaỽc
beth a|holei baredur idaỽ. a govyn idaỽ beth o|drỽc a|wnathoed
ef. Tewi a|oruc paredur a|chewilydyaỽ yn uaỽr am na syrth+
yassei y marchaỽc ganthaỽ. Eissyoes nyt oed haỽd huny* ka+
nys nyt oed yn|yr hoỻ vyt uarchaỽc vỽy o gedernyt yndaỽ noc
efo. ac ynteu a|doeth tu ac att baredur o nerth traet y uarch.
a|pharedur yn|y erbyn ynteu. a phob un a|drewis y gilyd onad+
unt yny dyỻa eu taryanneu. ac yny tyr eu ỻurygeu yng|ky+
ueir eu gỽaewyr ac yny yttoed penneu eu gỽaewyr yn ymdan+
gos udunt. a|r dyrnaỽt a roes paredur a|gerdaỽd drỽy y daryan
a|r hoỻ arueu. ac yny vyd y gỽaeỽ let deu vys dan benn y vronn.
a|r marchaỽc ynteu a|drewis paredur yny vyd yny vyd y gỽaeỽ
drỽy y daryan a|e arueu a thrỽy berued y|ureich. ac ar eu ruthur
yr ymgyuaruuant y·gyt yny yttoed eu gỽaet yn redec oc eu
geneueu ac oc eu ffroeneu aỻan. Ac ar hynny tynnu eu cled+
yfeu a|orugant drỽy diruaỽr lit. ac yna y marchaỽc a|ovynna+
ỽd y baredur pỽy oed y henỽ. a phaham yr oed ef mor lidia+
ỽc a|hynny ỽrthaỽ. a|thi a|m anefeist yn drỽc. a|mi a|ỽnn na
weleis eirmoet milỽr un gedernit a|thi. Ny dywaỽt paredur
dim ỽrthaỽ ef namyn trỽy lit ruthraỽ idaỽ. a|r marchaỽc a|e
herbynnyaỽd ynteu yn ffyryf. A|phob un onadunt a|roes