Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 167r

Ystoriau Saint Greal

167r

gemeu eur amdanaỽ. A chae maỽrweirthyaỽc ar y dỽyvronn.
a mein maỽrweirthyaỽc yndaỽ. a|choron o|eur am y benn.
a bwyaỻ eniỻec yn|y laỽ. a|r marchaỽc yn dec ac yn ieuanc.
Laỽnslot yna a|edrychaỽd yn ỻawen arnaỽ. Yna y|dywaỽt
ef ỽrth laỽnslot. Arglỽyd heb ef disgyn y|r ỻaỽr. Yn|ỻawen un+
ben heb·y laỽnslot a|disgynnu a|oruc. a ffrỽynglymu y i* varch
y myỽn modrỽy o eur a|oed yn|y mur. a|thynnu y daryan
y am y vynỽgyl a|e waeỽ ac eu roi ar|y|ỻaỽr. Arglỽyd heb·y
laỽnslot beth a vynny di beỻach. A vnbenn heb y marchaỽc ef
a|vyd reit ytt torri vym|penn i a|r|vỽyaỻ honn. neu ynteu
myui a|dorro y teu di. kanys yn|y mod hỽnnỽ y barnwyt arnaf.
Ef a vydei ffol heb·y laỽnslot y neb ny medrei ethol idaỽ e|hun
y goreu o|r|deu dewis hynn. ac yr hynny ual|kynt ef a|m goge+
nir o|ỻadaf|i dydi heb wneuthur ohonat chweith drỽc ym. ~
Yn|ỻe gỽir heb y|marchaỽc ueỻy y byd reit ytti y|wneuthur.
Arglỽyd heb·y laỽnslot paham y deuy di yn gyn decket ac yn
gyn|wrolet a|hynny y gymryt dy angheu. kanys ti a eỻy wybot
y ỻadaf|i dydi yn gynt noc y ỻedy di vyui herwyd dy amot ti.
Mi a|ỽnn hynny heb y marchaỽc. yr hynny ual|kynt. titheu
a|warenty y minneu kynn vy marỽ ar dyuot yma ar|benn
blỽydyn y hediỽ y roi dy benn o|e dorri yn|y mod y rof|inneu
y titheu hediỽ. Myn vyng|cret heb·y laỽnslot nyt oes amot nys
gỽnelỽyf yr cael yspeit y|m|hoedyl. Eissyoes ryued yỽ gennyf|i
dy dyuot ti yn gyn gyweiryet ac yd|ỽyt y odef dy angheu. Ar+
glỽyd heb ynteu y neb a|el geyr bronn y ˄iachwyaỽdyr ef a|dyly
bot yn|lan ac yn|bur o|e bechodeu. ac ueỻy yr|ỽyf|inneu yn|wir
ediueiryaỽc. ac yn|y pỽynt yma y|mynnaf|inneu odef vy angheu.