Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 163v

Ystoriau Saint Greal

163v

march* duỽ a|th dihango rac drỽc kanys creulonach yỽ y
casteỻ noc y tebygy di. a|duỽ a|danuono yno ryỽ dyn a|aỻo
diua yr aruer drỽc yssyd yno. Ac ar hynny ym·wahanu
a|orugant. a|dyuot a|oruc laỽnslot tu a|r kasteỻ. A gỽedy my+
net o·honaỽ dros bont vaỽr. ef a|edrychaỽd o|e vlaen. ac a
arganuu deu uarchaỽc urdaỽl yn aruaỽc ar eu meirch
a|deu ysgỽier yn|daly eu gỽaewyr yn eu hymyl. Ac yna
laỽnslot a|edrychaỽd ar porth y casteỻ. ac ef a|welei y doreu
yn ỻaỽn o varyfeu gỽedy eu taraỽ a hoelyon heyrn ỽrth+
unt. a phenneu ỻaỽer o varchogyon vrdolyon yng|croc
uch·benn y porth. a megys yd oed ef yn gadaỽ y porth y
deu uarchaỽc a doeth yn|y erbyn. ac vn o·nadunt a|dywa+
ỽt ỽrthaỽ. Arglỽyd heb ef tal dros dy fford kynn|dy|uynet
heibyaỽ. Paham heb·y laỽnslot ae veỻy y tal paỽp o|r a
el yma. Je heb ỽynteu y saỽl y bo baryf idaỽ ef a|e|tal. a|r
saỽl ny bo. aet yn ryd. Tydi eissyoes a|dely dros y teu di.
kanys maỽr iaỽn yỽ. a reit yỽ y ninneu ỽrthi. Y ba ryỽ
beth heb·y laỽnslot. Y wneuthur peissyeu raỽn y|r|meudwye  ̷+
it yssyd yn|y fforest yman. Myn vyn* |penn i heb·y laỽnslot
ny chaffant ỽy vn beis o|m baryf|i. Kaffant heb y mar+
chogyon. neu ynteu ef a|vyd ediuar gennyt. Laỽnslot
yna a ymgyffroes o|lit ỽrth vn|o|r marchogyon ac a|e tre+
wis a|e|waeỽ ym|perued y dỽy·vronn yny vyd ef a|e varch
y|r ỻaỽr. A|phan weles y marchaỽc araỻ y gedymdeith
yn varỽ. ef a|doeth att laỽnslot. ac|ynteu a|e|herbynnyaỽd
yn|y mod y bu reit y|r march·aỽc ˄hỽnnỽ heuyt syrthyaỽ dros be+