Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 153r

Ystoriau Saint Greal

153r

casteỻ hỽnn yma ynteu a|elwir casteỻ y govynneu. Ac ny
eỻy di na thi na neb govyn dim yma ar ny wyper beth a|arỽydoc+
kao. a hynny drỽy dystolyaeth iosep o arimathia. drỽy yr
hỽnn y gỽdam|ni. ac ynteu a gỽyr drỽy dystolyaeth yr yspryt
glan. M·yn vyng|kret heb·y gỽalchmei ryued vu gennyf we+
let y teir morynyon. y rei a|vuant yn ỻys arthur. ac a|dugas+
sant ganthunt deu benn. nyt amgen penn brenhin. a|phenn ~
brenhines. ac y|myỽn cadeir yd oed ganthunt. deudec|penn a|deuge+
int a chant o benneu marchogyon urdolyon. a|rei onadunt
a|oed gỽedy eu hinseilyaỽ a|phlỽm. ereiỻ ac aryant. ac ereiỻ
ac eur. Gỽir yỽ heb yr offeiryat. ac ỽynt a|dywedassant mae
o|achaỽs y vrenhines honno y ỻadyssit y brenhin. a chyme+
int ac a|oed o benneu yn|y gadeir. Gwir a|dywedassant heuyt
herwyd mal y tystolyaetha iosep. yr hỽnn a|dywaỽt ar gyffe+
lybrỽyd panyỽ drỽy eua y tỽyỻywyt adaf. a|chỽbỽl oc a do+
eth o·honaỽ ynteu. a|chanys adaf a grewyt yn gyntaf o|r pob+
loed. am hynny yd ydys yn|y alỽ ef yn vrenhin. kanys efo yỽ
yn tat daearaỽl ni. ac eua oed y vrenhines. yr honn y ỻas w+
yntỽy oỻ o|e hachaỽs. a|r penneu a|dywedy di. eu bot ac inseilyeu
o|eur arnunt. yd ys yma yn eu kyffelybu|ỽynt y|r cristonogyon
y rei a gredaỽd y|r gyfreith newyd. a|r penneu a|r inseilyeu ary+
ant arnunt a|arwydockaa yr idewon. a|r penneu inseilyedic o
blỽm a|gyffelybir y|r sarascinyeit. O|r tri amryỽ dynyon hyn+
ny yr|ordinhawyt y byt. Arglỽyd heb·y gỽalchmei eres yỽ
gennyf am gasteỻ y meudwy du. yn|y ỻe y ducpỽyt y penneu
y gennym. a|r vnbennes a dywaỽt ymi panyỽ pan delei y