Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 12v

Ystoriau Saint Greal

12v

dywedut im dy henỽ. mi a|archaf it yr duỽ. dywedut im
wirioned am y daryan honn a|phaham y|ducpỽyt hi y|r
wlat honn. A|pha|achaỽs yssyd yuot* y|saỽl ryuedaỽt ac ys+
syd yn|y wlat honn. Kanys angreithyeist di vyvi veỻy
heb y marchaỽc. Minneu a|e dywedaf itti. Ac eissyoes nyt
itti dy|hun y|dywedaf. namyn gỽedy delych drachevyn yma
ti a|r marchaỽc bieu y daryan. Arglỽyd heb yr ysgỽier a|arhoy
ditheu nyni yma. Arhoaf yn ỻaỽen heb ynteu. ~ ~ ~ ~
A C yna yr ysgỽier a|doeth att vrenhin bandymagus
ac a|ovynnaỽd idaỽ a vriỽassei yn|drỽc. do y·rof a|duỽ
heb ynteu. ual na|dianghaf onyt ar angheu degbygaf|i. a|eỻy
di varchogaeth heb ynteu. Mi a|e|profaf heb y brenhin ~
Ac yna ymlafuryaỽ a|oruc ef yny yttoed is|gil yr ysgỽier. a
marchogaeth a|orugant ỽy yny doethyant drachevyn y|r va+
nachlaỽc. A|phan wybu y rei a|oed yn|y vanachlaỽc eu bot
yn|dyuot. wynt a|doethant yn|y erbyn. ac a|dynnassant y
brenhin y|r ỻaỽr. ac a|e|dugassant y ystaueỻ y edrych y weli.
A galaath yna a|ovynnaỽd y|r manach a|oed yn|y edrych. a
debygy di heb ef a|vyd iach ef. kanys gormod darymes oed
y|r byt koỻi gỽr kystal ac efo mor di·ystyr a|hynny. Arglỽyd
heb y manach ef a|dieyngk os da|gan|duỽ. eissyoes heb ef yn+
teu a|essigaỽd yn|drỽc. ac ny dylyir kỽynaỽ hynny haeach
kanys rybud yỽ idaỽ hynny. a|gỽedy y|wahard y|duc ef y
daryan o|r achaỽs y dylyit y gynnal yn ỻe ffol. a|gỽedy dar+
uot udunt. kyweiryaỽ yng|kylch y weli. yr ysgỽier yna a
dywaỽt ỽrth galaath ual y clywei baỽp. Arglỽyd heb|ef y