Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 128v

Ystoriau Saint Greal

128v

a|oruc gỽalchmei. a|e roi yn|y ymyl. Y meudỽy yna a|duc udunt
y kyfryỽ vỽyt ac a|oed ganthaỽ. a|dỽfyr o|r ffynnaỽn o|e yuet. a gỽ+
edy daruot udunt vỽyta. yr vnbennes a|dywaỽt ỽrth y meudỽy.
Arglỽyd heb hi a|wdost di dywedut ymi vn|chỽedyl y ỽrth y
marchaỽc urdaỽl yd ỽyf yn|y geissyaỽ. Pa vn yỽ hỽnnỽ heb yn+
teu. Y marchaỽc urdaỽl o|r|santeid lines heb hi. Ny ỽn i heb ynteu
chweith diheurỽyd y ỽrthaỽ ef. namyn ef a|vu dỽyweith yman
yr panyỽ blỽydyn. arglỽyd heb hitheu ae ny wdost di amgenach
no hynny. Na|ỽn myn vyng|cret heb ynteu. a thitheu vnbenn
heb hi a|ỽdost di dim y|ỽrthaỽ ef. Mi a|vynnỽn y wybot heb·y
gỽalchmei yn gyn lawenet a chennyt titheu. a weleist ditheu
dim y ỽrth vorynyon y gadeir heb hi. Gweleis heb ynteu ac nyt
oes yn·emaỽr yr hynny. a yttoed eu|harglỽydes ỽy yn|dỽyn y|bre+
ich yng|kroc ỽrth y hysgỽyd. yttoed heb·y gỽalchmei. yna y|meu+
dỽy a|dywaỽt ac|a|ovynnaỽd y walchmei pwy oed y|henỽ. Ef a|m
gelwir i gỽalchmei. nei y|r amheraỽdyr arthur heb ynteu. Han+
vit hoffaf oỻ gennyf i hynny heb y meudỽy. arglỽyd heb yr
vnbennes nyt reit ytt vn vocsach yr dy vot yn nei idaỽ. ac myn
vyng|cret heb hi anhoff yỽ gennyf|i pob marchaỽc urdaỽl o|r
byt o|e achaỽs ef. yr hỽnn a gyfaruv a|mi yn ymyl capel seint aỽs+
tin. a|theckaf marchaỽc oed o|r a|weleis i eirmoet. ac yn ymlad
yn wraỽl ˄ac araỻ. ac ef a|e ỻadaỽd. a minneu a ercheis idaỽ ef|roi
ymi y benn ef. ac ynteu a|aeth o|e gyrchu. ac a|e duc ymi. Eis+
syoes pan dywaỽt ef ymi panyỽ arthur oed y henỽ. ny bu
vaỽr|hoff gennyf|i ef. am y vot yn vn henỽ a|r|brenhin drỽc hỽn+
nỽ. A|vnbennes heb·y gỽalchmei ti ˄a|eỻy dywedut yr hynn a|vynnych.