Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 121r

Ystoriau Saint Greal

121r

A vnbennes heb·yr arthur pei kyuarffei a mi ỻawen vydei
gennyf a|th neges ditheu mi a|e|dywedỽn ỽrthaỽ. 
A Rglỽyd heb y vorwyn ỻyna vyui gỽedy dywedut ytti yr
hynn yr wyf yn|y geissyaỽ. dywet titheu y minneu pỽy
dy henỽ ditheu. a unbennes heb ef mi a|e|dywedaf yn ỻawen.
Y|neb a|m atwaen i ỽynt a|m galwan arthur. Ae ueỻy y|th e+
lwir di heb hi. Je heb ynteu. Myn y gỽr a|m gatto i cassach yỽ
gennyf di yr aỽr·honn no chynneu. kanys ytiỽ henỽ y bren+
hin gỽaethaf o|r|hoỻ vyt arnat. a|mi a vynnỽn y vot ef yn|y
ỻe yr|ỽyt ti. Eissyoes ny daỽ ef yr·raỽc o gaer ỻion. rac ovyn my  ̷+
net ereiỻ a|e wreic. herwyd ual y kiglef|i dywedut amdan  ̷+
nunt. Yd oedỽn diwarnaỽt yn mynet parth a|e lys. pan gy  ̷+
uaruu a|mi yngkylch ugein o varchogyon urdolyon yn|dy+
uot o|r|ỻys. y rei a|dywaỽt y mi pob vn ual y gilyd panyỽ gỽ+
aethaf ỻys a|thlottaf o|r hoỻ vyt oed lys arthur. a chỽbỽl o var+
chogyon y vort gronn yssyd gỽedy y gadaỽ. o achaỽs y drygy+
oni ef. A unbennes heb·yr arthur ef a|digaỽn bot yn drist ~
am hynny. Mi a|giglef eissyoes y vot ef yn wr da ar y dechreu.
Paham heb hi beth a|eỻir a|e dechreu efo pan vo y diwed yn
drỽc. a|drỽc yỽ gennyf vot ar vilỽr kystal a|thydi henỽ gỽr
kyndrỽc ac efo. A unbennes heb·yr arthur nyt yr y henỽ y
mae drỽc ef. namyn o|e gaỻon. Gỽir a|dywedy di heb hi. ac
y ba|le y mae y|th vryt ti vynet odyma. Mi a|af heb ef y gaer ỻi+
on. y ymwelet ac arthur. Je heb hi ar hynt y drỽc y·gyt a|r drỽc
araỻ. A|vnbennes heb·yr arthur ti a|eỻy dywedut yr hynn a
vynnych. ac yn iach yti. Ny bydy iach di heb hi kanys y lys
arthur yd|ey. ~