Breudwd Rhyddiaith Gymraeg 1300-1425
English

LlGC Llsgr. Peniarth 11 – tudalen 106r

Ystoriau Saint Greal

106r

gaỽssant ymborth ysprydaỽl drỽy ras seint greal. yn|y me+
gys hynny mi a rodaf y chwitheu yr|hynn y buoch yr ys|ta+
lym yr ys|talym yn|y geissyaỽ drỽy y damunaỽ. ac yna ef a
doeth ac a|gymerth o|r racwerthuaỽr lestyr megys avyrỻaden.
ac a|doeth att galaath ac a|e roes idaỽ. ac ynteu yn vuchedaỽl a|e
kymerth dan ostỽng ar|dal y linyeu. ac ueỻy y gorugant pa+
ỽb o|e gedymdeithyon. Ac yna yn arglỽyd ni iessu grist. a|dywa+
ỽt ỽrth y kedymdeithyon ual yr|oedynt. A|wdaỽch chỽi heb ef ~
beth yd ỽyf|i yn|y daly y·rỽng vyn|dwylaỽ. Na|wdam arglỽyd ~
heb ỽynteu. ỻyma heb ef y dysgyl y bỽytaaỽd iessu grist o·ho+
nei yr oen y·gyt a|e|disgyblon. Honn yỽ y|dysgyl a|wnaeth* pa+
ỽp ỽrth y ewyỻys o|r rei a|geueis i yn vy|ngỽassanaeth. Ac yna
y dywaỽt ef chwchỽi a|welsaỽch yr hynn yd|oedeỽch yn|y damu+
naỽ. chwchỽi eissyoes galaath paredur a bỽrt. nys|gỽelsaỽch
chỽi yn gyn|gỽplet ac y gỽelỽch rac ỻaỽ. ac a|wdaỽch chỽi
pa|le y gỽelỽch yn|dinas sarras yn|y ỻe ysprydaỽl. ac am|hyn+
ny ef a|vyd reit y chỽi aỽch tri. vynet y gynnal kedymdeith+
yas y|r ỻestyr ysprydaỽl hỽnn. yr|hỽnn a|gychwyn o ynys pry+
dein heno megys na weler beỻach vyth. yn|yr ynys honn.
ac a|wdaỽch chỽi paham am na wassanaethỽyt. ac am nat  ̷
anrydedwyt yn|y mod y dylyit. o|r achaỽs y byd gỽaeth y
bobyl o|r ynys honn vyth. ac am hynny y byd reit y chỽi
avory vynet tu a|r mor. ac yno chỽi a|geffỽch ysgraff. yn
yr honn y caỽssaỽch gynt y cledyf a|r estronaỽl arwest.
Paham anrydedus arglỽyd heb·y galaath na reyngk
bod ytti dy·uot hynn oỻ o gedymdeithyon gyt a myvi.