Breudwd Rhyddiaith Gymraeg 1300-1425
English

LlGC Llsgr. 3036 (Mostyn 117) – tudalen 260

Brut y Brenhinoedd

260

dylyedogyon yr holl teyrnas a duc y tywyssog n
hynny ganthunt hyt y wlat hon. Ar anlyedogy+
on a trigyassant yma. A phan gauas yr anlyedo+
gyon medyant maỽr y guyr bonhedic dylyedaỽc
ymdrychauel a| wnaethant ỽynteu yg kamryuyc
a syberwyt yn uỽy noc y canhadei dylyet Ac o or+
modyon kyfoeth a drythyllỽch a golut ymrodi y
odinab megys na chlyỽspỽyt y kyffelyp ym plith
y kenedloed. A megys y dyweit Gildas hyt nat
mỽy y pechaỽt hỽn no phop pechaỽt o|r a uyd ym
plith y kenedloed. Ac yn penhaf y peth a distryỽ
yr holl da. Cassau guiryoned. A charu kelwyd. A th+
alu drỽc dros da. Anrydedu enwired dros hygarỽch.
Aruoll diafỽl dros egyl goleuat. Vrdaỽ brenhined
A wneynt o|r rei A ỽyppynt eu bot yn greulonhaf.
Ac yn| y lle trỽy tỽyll ac enwired y bredychynt ac y
lledynt. Ac eilweith ethol ereill a uei greulonach.
Ac o bei vn a garei wiryoned yn uỽy noe gilyd; hỽn+
nỽ a diholynt megys bratỽr ynys prydein. Ac a
distrywynt oc eu holl ynni. Ac yuelly y gỽneynt
pop peth y gỽrthỽyneb y wiryoned. Ac ny cheissynt
dim gan vedyc yr holl nerthoed. Ac ygyt a hynny
hyt nat mỽy y| gỽnaei y dynyon byt hynnỽ; nam+
yn y meneich ar eglỽyswyr a chenueint duỽ e| hun.
Ac ỽrth hynny nyt ryued bot yn gas gan duỽ y ge+
nedyl a wnelhei y ryỽ weithredoed hynny. Ac o|r ach+
aỽs hỽnnỽ colli o·nadunt tref eu tat ac eu gỽlat.