Breudwd Rhyddiaith Gymraeg 1300-1425
English

LlGC Llsgr. 3036 (Mostyn 117) – tudalen 215

Brut y Brenhinoedd

215

a| dylyỽn y talu yn erbyn yr ymadrodyon hyn. kanys
py beth bynhac a| racuedylhyo doethon yn da. pan
delher ar| weithret haỽs uyd y| diodef. A heuyt herw+
yd y tebygaf| i nyt reit inni ofyn guyr rufein ka+
nys trỽy anylyet y| maent yn keissaỽ teyrnget 
o ynys prydein ỽrth dyuot vlkessar ac amherod+
ron ereill guedy vlkessar a chyn noc ynteu a llu
aruaỽc gantunt. Ac o treis ac anuundeb an reeni
ninheu gorescyn y wlat a guneuthur yn trethaỽl
udunt trỽy treis a| chribdeil. A phy beth bynhac a
odiwether ynteu trỽy treis a| chymhell; ny dyly
caffel kedernyt yỽ gynhal. Ac ỽrth hynny can yt+
tiỽ amheraỽdyr rufein trỽy anylyet yn keissaỽ an
bot ni yn trethaỽl idaỽ ef. minheu trỽy dylyet iaỽn
a holaf teyrnget idaỽ ynteu o rufein. Ar kadar+
naf o·honam; kymeret teyrnget y| gan i gilyd.
kanys o guerescynnỽys vlkessar ac amherodron
ereill oc eu kedernyt ynys prydein. Ac o achaỽs hyn+
ny kymhell teyrnget o·honei yn aỽr. Yn gynhebic
y hynny. minheu a| uarnaf dylyu o·honaf inheu
teyrnget o rufein. kanys uy reeni inheu gynt
a orescenassant rufein. Beli a bran meibon dyf+
ynwal moel mut a| grogassant petwar gỽystyl
ar hugeint o dylyedogyon rufein rac bron y gaer.
Ac a|e medassant trỽy lawer o amser. A guedy
hynny custenhin vab elen. A maxen wledc* vyg
kereint inheu a| uuant amherodron ynn rufein.