Breudwd Rhyddiaith Gymraeg 1300-1425
English

LlGC Llsgr. 3036 (Mostyn 117) – tudalen 134

Brut y Brenhinoedd

134

hỽnnỽ py ỽn bynhac o|r saesson a|gyfarffei ac ef. yny
bei uriwedic y pen a|e emenhyd y hanuonei parth
ac uffern. Ac yna ar paỽl bendigeit hỽnnỽ y briwei
ef pen vn. y arall y yscỽydeu. y|arall y vreicheu a|e
dỽy laỽ. y arall y traet a|e esceired y|ỽrth y gorff. Ac
ny orffowyssỽys eidol o|r ruthyr hỽnnỽ; hyny lada+
ỽd deg wyr a|thri vgeint ar vn paỽl hỽnnỽ. A guedy
guelet o·honaỽ na allei ef e hun gỽrthỽynebu yr
niuer hỽnnỽ. kymryt y ffo a wnaeth hyny doeth y
dinas e|hun. A llawer a syrthỽys yna o pop parth.
Ac eissoes yr yscymun uudugolyaeth honno a ga+
uas y ssaesson. Ac yr hynny eissoes ny ladassant ỽy
ỽrtheyrn. namyn y|garcharu a chymhell arnaỽ rodi
udunt y|dinassoed ar|kestyll. Ar lleoed kadarn ynys
prydein; yr y ellỽg. Ac yna y rodes Gỽrtheyrn udunt
pop peth  a|uynassant yr y ellỽg. Ac yna y kymy+
rth y saesson y gantaỽ llundein. A chaer efraỽc. A lin+
col a chaer wynt gan lad eu kiỽtaỽtwyr. megys y
lladei vleideu y deueit guedy as adaỽei eu bugeil.
A guedy kymryt kedernyt y|gantaỽ ac aruoll. yd
ellygỽyt. A guedy guelet o ỽrtheyrn y truan aer+
ua honno ar y priodoryon y gan yr yscymun pobyl
saesson. Sef a|wnaeth ynteu kilyaỽ parth ac emyl+
eu kymry. kany wydyat peth a wnaei yn erbyn
yr yscymun pobyl honno.
A Galỽ a oruc gỽrtheyrn attaỽ holl doethon a hen+
aduryeit yr ynys. A gouyn udunt beth a|wnai.