Breudwd Rhyddiaith Gymraeg 1300-1425
English

LlGC Llsgr. 3036 (Mostyn 117) – tudalen 110

Brut y Brenhinoedd

110

dynyon. gelỽch ar grist hyt pan uo euo a|rodho iỽch
leỽder a rydit. A guedy teruynu o|r archescob y ym+
adraỽd a|e parabyl yn|y wed honno. kymeint
uu y kynhỽrỽf yn|y pobyl a|r|nifer. A megys y te  ̷+
bygit yn deissyuyt eu bot guedy eu kyflenwi o leỽder
AC yn ol y|parabyl hỽnnỽ y rodes y|rufeineit
cadarnon dysgetdigaetheu ar ymladeu
yr ergrynedic pobyl honno. Ac adaỽ agreiff ud+
unt y wneuthur aeruaeu. Ac erchi udunt adeil  ̷+
at kestyll a thyroed ar lan y mor yn|y porthueyd
y bei discynuaeu llogeu ỽrth cadỽ eu gulat onad+
unt rac eu gelynyon. haỽs yỽ eissoes wneuth+
ur hebaỽc o|r barcut; noget gỽneuthur bilein
yn dyscedic ar vrỽydyr. A phỽy bynhac a|rotho
dysc o anodun doethineb idaỽ; kynhebic yỽ y|r
neb a|was·carei gemmeu maỽrweirthaỽc dan tra+
et moch. Ac yna kychwyn a|wnaeth gỽyr rufe+
in y ymdeith megys ar odeu na delhynt y|r ynys
hon trachefyn. Ac ar hynny nachaf yn|y lle y|rac  ̷+
dywededigyon elynyon uchot Guinwas a|mel+
was yn dineu o|r llogeu y|r tir. A llawer o niferoed
gantunt o|r gỽydyl a|r yscoteit a|r ffichteit. A|r
llychlynwyr a guyr denmarc. A phop kenedyl o|r
a allassant y|gaffel ygyt ac ỽynt. A gorescyn yr|al  ̷+
ban yn diannot o vyỽn y mur. A guedy gỽybot
onadunt yr vynet gỽyr rufein y ymdeith heb
obeith ymchoelut trachefen. Ehofnach noc y|gno+