Breudwd Rhyddiaith Gymraeg 1300-1425
English

LlGC Llsgr. 3036 (Mostyn 117) – tudalen 109

Brut y Brenhinoedd

109

o·honaỽch witheu pobyl agkyfrỽys yỽch heb
ỽybot dim y|ỽrth ymlad. namyn yn achubedic
o amryfalyon negesseu a chyfnewidyeu. A diỽ  ̷+
yllodraeth y dayar. yn uỽy noc yn dysc ymladeu.
Ac ỽrth hynny pan deuth aỽch gelynyon am aỽch
penn. y|ỽch kymhellassant y adaỽ ach keibeu. A me+
gys deueit kyfeilornus heb uugeil arnadunt
aỽch guascaru. kany mynassaỽch kymyscu aỽch
dỽy laỽ ac arueu nac ar dysc ymlad. Ac ỽrth hyn  ̷+
ny py hyt y keissỽch i bot rufeinhaỽl  arglỽ+
ydiaeth yn vn gobeith iỽch. Ac yd ymdiredỽch yn
estraỽn genedyl ny bei deỽrach na chadarnach
no chwi pei na|r atteỽch y lesced aỽch goruot. Ed+
nebydỽch heuyt bot guyr rufein yn blinaỽ ragoch.
Ac yn ediuar gantunt y gnifer hynt a gymersant
tros vor a thros tir gan ymlad ac eu gelynyon.
trossoch yn wastat. Ac y weithon y maent yn de  ̷+
wissaỽ madeu eu teyrnget iỽch ymlaen diodef
kyfryỽ lafur a hỽnnỽ trossoch bellach. pe bydeỽch
chwi yn yr amser y bu y marchogyon yn ynys
prydein. beth a tebygỽchi ae yr hynny y teby+
gỽch i ffo dynaỽl anyan y ỽrthyỽch. A geni dyny+
on y|gỽrthỽyneb anyan. megys pei genhit o|r bilein
varchaỽc. Ac o|r marchaỽc vilein. Ac yr hynny eissoes
discynnu dyn y|gan i|gilyd. ny thebygaf|i colli o+
nadunt ỽy eu dynyaỽl annyan yr hynny. Ac ỽrth
hynny kanys dynyon yỽch; gỽneỽch megys y|dyly.