Breudwd Rhyddiaith Gymraeg 1300-1425
English

LlGC Llsgr. 3036 (Mostyn 117) – tudalen 100

Brut y Brenhinoedd

100

guelet o gynan meiradaỽc hynny. blyghau a oruc yn+
teu a llidyaỽ a mynet odyno parth a|r alban. A chynnu+
llaỽ llu diruaỽr gantaỽ. A ryuelu ar uaxen.
AC a|r llu hỽnnỽ gantaỽ dyuot trỽy humyr. A de  ̷+
chreu anreithaỽ y|guladoed hynny o pop parth.
A guedy menegi hynny y vaxen. kynnullaỽ llu a
wnaeth ynteu mỽyhaf a allỽys a mynet yn|y er+
byn. A rodi kat ar|uaes y|gynan meiradaỽc a oruc
a|e yrru ar ffo. Ac eissoes ny pheidỽys kynan nam  ̷+
yn kynnullaỽ y lu eilweith ac anreithaỽ y gulado+
et mal kynt. A gueitheu gan uudugolyaeth a gue+
itheu ereill hebdi yd ymhoelei vaxen y|ỽrthaỽ. Ac
o|r diwed eissoes guedy gỽneuthur o pop vn colle+
deu maỽr y|gilyd. kymodi a|wnaethant trỽy eu ket+
ymdeithon. A dyuot trachefyn yn vn garyat.
AC ym pen yspeit pum mlyned syberwhau a
wnaeth maxen o amhylder eur ac aryant a
sỽllt A marchogyon a chynifwyr. Ac yn|y lle para+
toi llyghes a oruc a|chynnullaỽ attaỽ holl ymlad+
wyr ynys prydein. Ac a allỽys y|gaffel o leoed ere+
ill. A guedy bot pop peth yn paraỽt. kychwyn a or+
uc parth a llydaỽ y wlat a elwir brytaen vechan.
A guedy y dyuot idi dechreu ymlad a|r pobyl oed
yndi o freint. A|r dyd hỽnnỽ y llas himbalt eu ty+
wyssaỽc A phymtheg mil o wyr aruaỽc ygyt ac
ef. A phan welas maxen meint yr aerua a wnath+
oedit o|r gelynyon. A gỽybot o·honaỽ bot yn haỽd