LlGC Llsgr. 3035 (Mostyn 116) – tudalen 92r
Brut y Brenhinoedd
92r
yn ymlad a|r paganyeit namẏn yn vynych eu kyrchu a|phan
ymchoelynt yn|y ỻe elchwyl y|kyrchynt gan atnewydu
eu gleỽder ac ny pheidassant hyt pan gaỽssant y vudu+
golyaeth Ac ỽrth hyny fo a|wnaeth y|saesson paỽb me+
gys y dyckei y|ruthur rei y|r keyryd a|r dinassoed. Ereiỻ
y|r mynydet a|r koedyd ereiỻ y|r ỻogeu Ac yna yd aeth
octa mab hen·gist ac amylder o nifer gyt ac ef hyt yg
kaer efraỽc ac ossa y gar hyt yg kaer alclut Ac veỻy
o aneiryff amylder o varchogyon aruaỽc yd ymgadarn+
A c veỻy gỽedy goruot o Emrys wledic [ [ assant ~
a|r brytanyeit. ef a gafas kaer gynan yr hon a dywe+
dassam ni vchot. Ac yno y bu tri·dieu yn gorffowys
ac yn hyny o yspeit yd erchis cladu y|ỻadedigyon. a|me+
deginyaethu y|rei brathedic a gorffowys y|rei ỻadedic drỽy
amryfaelon artymerheu A gỽedy hẏnẏ galỽ attaỽ y|ty+
wyssogyon a|r barỽneit a oruc a gofyn vdunt beth a vyn+
nynt y|wneuthur o hengyst Ac yno y|doeth eidal escob
kaer loyỽ gỽr goruchel y brudder a|e synhỽyr a|e grefyd
Ac ygyt ac y|gỽelas ef hengyst yn sefyỻ rac bron y bren+
hin; ef a erchis y|baỽb tewi Ac ynteu a dywaỽt val hyn
pei ỻafuryei paỽb ohonaỽch|i y rydhau hỽn. Mi a|e dryỻỽn
ef yn dryỻyeu man. gan erlit ohonaf|i agreiff samuel
broffỽyt pan gafas ef a·gag vrenhin amalec yn|y vedy+
ant. ef a|e dryỻyaỽd yn dryỻeu Ac a dywaỽt. Megys y
gỽnaethost ti mameu heb veibon. veỻy hediỽ mineu a
wnaf dy vam titheu heb vab ym|plith y|gỽraged Ac veỻy
gỽneỽchwitheu y hỽn kanys eil a·gag yỽ Ac ỽrth hyny
eidol a gymerth cledyf ac a|e duc y·dieithyr y|tref A gỽe+
dy ỻad y|pen. a|e goỻygaỽd y vffern. Ac eissoes Emrys
wledic megys yd oed hynaỽs ym pop peth a erchis y gladu
| « p 91v | p 92v » |