Breudwd Rhyddiaith Gymraeg 1300-1425
English

LlGC Llsgr. 3035 (Mostyn 116) – tudalen 77v

Brut y Brenhinoedd

77v

ỽynt a|kadarnheynt drỽy peunydyaỽl wyrtheu ac
en·ryfedodeu a|wnaei duỽ yrdunt. Ac yna gỽedy rodi
y vorỽyn y|r brenhin. y dywaỽt hengyst yr ymadraỽd
hỽn. Miui heb ef yssyd megys tatmaeth itti. Ac o|r bydy
ỽrth vyg kygor. i ti a orchyuẏgẏ dy hoỻ elynyon drỽy
vym porth|i a|m kenedyl Ac ỽrth hynny gohodỽn etwa
offa vy mab attam. Ac ossa vyg|kefyn·derỽ. kanys ryuel+
wyr ynt goreu o|r byt A|dyro vdunt y gỽladoel* yssyd
y·rỽg deifyr a|r mur. Ac ỽynt a|e kynhalant rac estraỽn
genedyl mal y geỻych titheu kaffel yn hedỽch o|r parth
hỽn y humyr. Ac vfydhau a|wnaeth gỽrtheyrn rth y
kygor hỽnnỽ. Ac yna yd anuones hengyst hyt yn ger+
mania Ac odyna y doethant offa ac ossa a chledric a|thry+
chant ỻog gantunt yn ỻaỽn o|warchogyon aruaỽc. a
hyny oỻ a aruoỻes Gỽrtheyrn yn ỻawen. Ac a urdỽys
paỽb onadunt yn|y ỻe o rodyon maỽrweirthaỽc. kanys
ym pop kyfranc y bydy oruydaỽdyr drỽydunt Ac veỻy
beunyd eissoes yd achwanegei hengyst y lu drỽy dỽyỻ
a brat ganedic gantaỽ A gỽedy adnabot hyny o|r brytan+
yeit daly ofyn a wnaethant Ac erchi y|r brenhin eu
gyrru o teyrnas ynys prydein. kany wedei y cristyno+
gyon kytym·deithockau a|phaganyeit nac ym·gymys+
gu ac ỽynt. kanys kyfreith a dedyf gristynogaeth a|e
gỽahardei Ac y·gyt a hyny kymeint oe* eu nifer ac nat
oed haỽd adnabot pỽy a vei gristaỽn pỽy a vei pa·gan
Ac y·gyt a|hyny seint garmon escob a orchymynassei
vdunt dihol y|paganyeit saesson oc eu plith Ac eissoes
sef a|wnaeth. Gỽrtheyrn o garyat y wreic a|r saesson ys+
kael·ussaỽ y brytanyeit. A|phan welas y brytanyeit hẏnẏ
Sef a|wnaethant ymadaỽ a gỽrtheyrn A chymryt Gỽerth+