Breudwd Rhyddiaith Gymraeg 1300-1425
English

LlGC Llsgr. 3035 (Mostyn 116) – tudalen 71v

Brut y Brenhinoedd

71v

a chan bop tywyssaỽc kan kyfaruu dryc·tyghetuen a|hi
A|thros pop peth o|r a|gyferyỽ a hi dryc·arglỽydiaeth gỽyr
rufein a argywedus yn vfydhaf idi. hyt na eiỻ neb
tywyssaỽc beỻach kynhal y|teilygdaỽt idi. heb arwein
rufeinaỽl geithiwet arnaỽ gan dalu teyrnget.
vdunt o·heni. Ac ỽrth hẏnnẏ ỽrda heb ef Pỽy ny bei
weỻ gantaỽ kyfoeth bychan yn ỻe araỻ yn ryd heb
geithiwet. noc vn maỽr yn ỻe y bei y dylyet gan
dragywydaỽl geithiwet. Ac eissoes heb ef. kanys
yr ynys a dywedy ti a vu eidun vy rieni inheu. Mi
a rodaf yn ganhorthỽy yt gustenin vy mraỽt a
dỽy vil o varchogyon y·gyt ac ef y edrych a|vynho
duỽ idaỽ gaỻu rydhau yr ynys honno y gan ormes estron+
yon genedloed aghyfyeith a chymeret ef coron y|teyrnas
a bit vrenhin yno o myn duỽ y ganhadu idaỽ ac
rac bygỽth ryfel yssyd arnaf y gan y freinc nyt a+
daỽaf. i yr aỽrhon o varchogyon itti vỽy no hynẏ
Abreid vu o|daru y|r brenhin teruynu y ymadraỽd
pan rodes kuelyn archescob ỻawer o|diolcheu idaỽ
am hynnẏ. Ac yn|y ỻe galỽ custenin a dywedut ỽrtha
val hyn. Crist heb ef a oruyd. Crist a wledycha. crist
a|orchyuycca. ỻyma vrenhin ynys prydein diffeith. crist
a|e canhorth·ỽyo. ỻyma an amdiffyn ni ac an gobeith
a|n ỻewenyd. Py beth gỽedy hynny yn|y ỻe gỽedy bot
yn baraỽt y|ỻogeu ar y|traeth. ethol marchogyon
ac eu rodi y guelyn archescob a custein gyt ac ỽynt.
A c yn dianot pan vu baraỽt eu kyfreideu kychwẏn
ar y|mor a orugant a|dyuot y borth tỽtneis
y|r tir Ac yn dianot kynuỻaỽ a aỻysant y gafel
o|wyr ynys prydein A|chyrchu eu gelẏnẏon. A