Breudwd Rhyddiaith Gymraeg 1300-1425
English

LlGC Llsgr. 3035 (Mostyn 116) – tudalen 70r

Brut y Brenhinoedd

70r

kestyỻ ar lan y|mor yn|y porthuaeu y bei diskynuaeu
ỻogeu ỽrth gadỽ eu gỽlat o·nadunt rac eu gelẏnẏon
Ac eissoes haỽs yỽ gỽneuthur hebaỽc o|r barkut no
gỽneuthur bilein yn dysgedic ar vrỽydyr. Pỽy byn+
ac a rotho dysc o anodun doethinab idaỽ kynhebic
y|r neb a|wasgarei gemeu maỽrwerthaỽc ydan draet
moch Ac yna kychwyn a|wnaeth gỽyr rufein yme+
ith megys ar vedyr na delynt y|r ynys hon drachefyn
Ac ar hynny nachaf yn|y ỻe y|racdywededigyon elynyon
vchot. Gỽinwas a melwas yn dineu o|r ỻogeu y|r tir
a ỻawer o|niferoed gantunt o|r gỽydyl a|r yscotteit
a|r fichteit a|r ỻychlynwyr a gỽyr denmarc a|phob
kenedyl o|r a aỻyssant y kaffel ygyt ac ỽynt. A|gỽeres+
kẏn yr alban yn dianot o vyỽn y|r mur A gỽedy gỽe+
dy gỽybot o·nadunt yr vynet gỽyr rufein ymeith
heb obeith ymchoelut drachefyn. ehofnach noc y gno+
tehẏnt yd ymranassant y distryỽ y|mur Ac yna y gosso+
det y|ỽ hamdiffyn ỽynteu y bileinỻu diar·uot a·ghyf+
rỽys ar ymlad. Paraỽt ar ffo bei as ỻefessynt. Ac ny
orffoỽyssynt y gelynyon o vỽrỽ agheuolyon ergyttyeu
yn eu plith ac o|vỽrỽ bacheu gỽrthỽynebaỽc ỽrth
linyneu. Ac veỻy y trymyon vileinỻu o|r kestyỻ ac
o|r kaeroed a|tynynt hyt y|ỻaỽr Ac yna drỽy amryỽ
boeneu y|gorffynynt eu hageu a|digaỽn o didan ac
o|da gan y neb a|gaffei y|ryỽ agheu hỽnnỽ arnaỽ rac
y|ryỽ amryfaelon boeneu a welynt y|wneuthur ar
eu kereint ac eu ketymdeithon yn eu gỽyd Oi a
duỽ maỽr a|beth gỽelet dỽywaỽl dial ar ẏ bobyl  ̷